19 февраль куни АОКАда ИИВ ЙҲХББ раҳбар ва мутасаддилари иштирокида ўтказилган матбуот анжуманида Ўзбекистонда 2020 йилда аукцион орқали сотилган авторақамлар тўғрисида маълумот берилди.
Маълум қилинишича, 2020 йил давомида аукцион савдолари орқали жами 98 898 та давлат рақами белгилари сотилган.
«Вазирлар Маҳкамасининг 2017 йил 31 августдаги 683-сон қарорига ўзгартиришлар киритилиб, аукцион савдолари орқали сотиладиган давлат рақами белгилари тоифаларининг сони 3 тадан 6 тага, биржага қўйиладиган давлат рақами белгилари сони 65 тадан 328 тага ўзгартирилди. 2020 йил давомида аукцион савдолари орқали 98 898 та давлат рақами белгиси, 243 миллиард 185 миллион 752 минг сўмга сотилди», — дейилади хабарда.
Шунингдек, таъкидланишича, ўтган йил давомида йўл ҳаракати қоидабузарлиги тўғрисида баённомаларни электрон тарзда расмийлаштириш учун 3514 та планшет мосламалари харид қилиниб, тўлиқ ишга туширилган.
Аввалроқ 2020 йил бошидан буён Республика товар-хом ашё биржасининг Avtoraqam.uzex.uz веб-сайтида 262,6 миллиард сўмлик 106 мингдан зиёд авторақам шаффоф онлайн аукционлар орқали сотилгани тўғрисида хабар берилганди.
Эслатиб ўтамиз, авторақамларнинг онлайн аукционларда сотилишидан келиб тушган маблағларнинг 80 фоизи давлат бюджетига, 20 фоизи Ички ишлар вазирлигининг моддий-техник базасини ривожлантириш, ходимларини моддий рағбатлантириш ва бошқа харажатлар махсус жамғармасига йўналтирилади.
Маълумот учун, 2019 йилда онлайн аукционлар орқали 156,1 миллиард сўмлик чиройли рақамлар сотилганди.
Изоҳ (0)