2019-yilda onlayn auksionlar orqali 156,1 mlrd so‘mlik chiroyli raqamlar sotildi
2019-yilda “avtoraqam.uzex.uz” vebsaytida onlayn auksion orqali 156,1 milliard so‘mlik 36,3 mingdan ziyod chiroyli avtoraqamlar sotildi. Bunda avtoraqamlarning sotuvi son jihatdan 51,1 foizga, hajmi bo‘yicha esa 28,3 foizga o‘sdi. Tuzilgan bitta bitimning o‘rtacha qiymati 4,3 million so‘mni tashkil etgan. Bu haqda O‘zRTXB matbuot xizmati “Daryo”ga xabar berdi.
O‘zbekiston Respublika tovar xomashyo birjasi 2019-yilda davlat xaridlari bo‘yicha maxsus axborot portali “xarid.uz”ning operatori sifatida o‘z faoliyatini davom ettirdi. Yil davomida budjet va korporativ buyurtmachilar portalda davlat xaridlari bo‘yicha barcha e’lonlarni joylashtirib, davlat xaridlarini amalga oshirishda elektron auksion va elektron do‘kon tizimlaridan samarali foydalandi.
2019-yil yakunlariga ko‘ra, mazkur portalda jami 3,8 trillion so‘mlik bitimlar tuzildi. Budjet va korporativ buyurtmachilar tomonidan tejalgan mablag‘larning umumiy miqdori esa 805,8 milliard so‘mni tashkil etdi. Tuzilgan bitimlarda kichik biznes subyektlarining ulushi 95 foizdan oshdi.
