Jizzax shahridagi plastmassa quvurlar ishlab chiqaruvchi korxonada yong‘in sodir bo‘ldi

Jizzax shahrida joylashgan Master Building Products mas’uliyati cheklangan jamiyatida yong‘in sodir bo‘ldi, deb xabar beradi FVV matbuot xizmati.

Ma’lum qilinishicha, 19-fevral kuni soat 09:05 da Jizzax shahar “Sanoat A” hududida joylashgan Master Building Products plastmassa quvurlari ishlab chiqarish qo‘shma korxonasi hududida joylashgan kompressor binosida yong‘in yuzaga kelgani to‘g‘risida yong‘in-qutqaruv xizmatiga xabar kelib tushgan.

“Xabar asosida voqea joyiga yong‘in o‘chirish ekipajlari soat 09:10 da yetib borgan, yong‘in soat 09:18 da o‘rab olinib, 09:40 da to‘liq o‘chirilgan”, — deyiladi xabarda.

Yong‘in oqibatida binoning taxminan 90 kvadrat metr maydonida shift qismi hamda uskunalar yongan. Olib borilgan harakatlar natijasida ishlab chiqarish sexining 1400 kvadrat metr maydoni yong‘indan saqlab qolingan.

Tan jarohati olganlar va halok bo‘lganlar qayd etilmagan. Hozirda yong‘in sababi va moddiy zarar miqdori aniqlanmoqda.

Avvalroq Nukusda eshik ishlab chiqarish sexida yong‘in yuz bergani, Namangandagi xonadonda ro‘y bergan yong‘in bir soatdan so‘ng bartaraf etilgani, Farg‘onadagi oziq-ovqat do‘konida yong‘in kelib chiqqani, Gulistondagi “Eski bozor” hududida joylashgan qassobxonada yong‘in chiqqani haqida xabar berilgan edi.