Uzbekneftgaz GTL zavodida olib borilayotgan investitsion loyiha holatini o‘rganish maqsadida O‘zbekiston Respublikasi investitsiyalar va tashqi savdo vazirining o‘rinbosari Olimxon Rustamov “O‘zbekneftgaz” AJ boshqaruvi raisi Mehriddin Abdullayev hamrohligida qurilish maydonida bo‘ldi.
Tashrif davomida investitsiya loyihasining amalga oshirilishi, qurilish montaj ishlarini yakunlash holati, tashqi infratuzilma obyektlari qurilishining olib borilishi, shuningdek, Uzbekneftgaz GTL korxonasini ishga tushirish, sozlash ishlarining amalga oshirilishi jarayonlari o‘rganildi.
Bugungi kunga kelib, korxonaning qurilish maydonida asosiy qurilish montaj ishlari yakunlanib, ishga tushirish va sozlash oldi ishlari bosqichma-bosqich, faol sur’atlarda olib borilmoqda.
Ta’kidlash kerak, bugungi kunda zavoddagi qurilish montaj ishlarining asosiy qismi yakunlanmoqda, bosqichma-bosqich ishga tushirish ishlari bajarilib, foydalanishga topshirilmoqda.
So‘nggi bosqich ishlarni tugallash uchun esa ayni vaqtda zavodda 9 ming 300 nafar ishchi xodim, 600 dan ortiq maxsus texnika yordamida mehnat qilmoqda.
Bugungi kunda loyihaning bosh pudratchilari – Koreyaning Hyundai Engineering, Hyundai Engineering&Construction hamda Enter Engineering (Singapur) konsorsiumi tomonidan zavodda uskunalarni ishga tushirish ishlari faol sur’atlar bilan olib borilmoqda.
Xabaringiz bor, zavodda asosiy podstansiya ishga tushirildi va korxonaga elektr ta’minoti qabul qilinishi boshlandi. Shuningdek, 2-son nazorat o‘lchov priborlari va avtomatika xonasi binosida ishga tushirish, sozlash ishlari yakunlandi. Zavodda birinchi marotaba yong‘inni o‘chirish suv tizimi 82-sonli qurilmasi ishga tushirildi.
Loyiha amalga oshirilishi bilan tanishish davomida, xom suv tayyorlash qurilmasi, ya’ni demineralizatsiyalangan suvni ishlab chiqarish tizimidagi ishga tushirish, sozlash ishlari (71 va 87-qurilmalar) holatlari ham o‘rganildi.
Bundan tashqari, korxonaning markaziy boshqaruv pulti, nazorat o‘lchov priborlari va avtomatika tizimi uchun siqilgan havo ishlab chiqarish qurilmasi (75-qurilma) shuningdek, bir qator boshqa qurilmalar ish faoliyati bilan tanishib chiqildi.
“O‘zbekneftgaz” boshqaruvi raisi Mehriddin Abdullayev va O‘zbekiston Respublikasi investitsiyalar va tashqi savdo vazirining o‘rinbosari Olimxon Rustamov tashrifida suvni sovutish tizimi foydalanishga tayyor holga keltirilganining guvohi bo‘lishdi va aynan ular ushbu tizimni ishlatish uchun start berishdi.
O‘z navbatida boshqaruv raisi Uzbekneftgaz GTL zavodi bosh direktori Faxriddin Abdurasulovga ishga tushirish oldi va ishga tushirish ishlarini sifatli bajarilishini ta’minlashga doir ko‘rsatmalar berdi.
Boshqaruv raisi xavfsizlik, mehnatni muhofaza qilish va sanoat xavfsizligi qoidalari va talablariga qat’iy rioya qilish, korxonaning ekspluatatsiya xodimlarini yuqori sifatli tayyorlash, shuningdek, ishga tushirish sozlash ishlarini yuqori sifat bilan bajarishga qaratilgan qator boshqa ko‘rsatmalarga alohida e’tibor qaratdi.
Uzbekneftgaz GTL korxonasining ishga tushirilishi joriy yilga rejalashtirilgan bo‘lib, unda 93 ming tonna aviakerosin, 220 ming tonna dizel yoqilg‘isi, 133 ming tonna nafta va 16 ming tonna suyultirilgan gaz ishlab chiqarish ko‘zda tutilgan.
“O‘zbekneftgaz” AJ matbuot xizmati
Izoh (0)