Toshkent viloyati Zangiota tumanida fermer xo‘jaliklari rahbarlari sug‘oriladigan yerlarni noqonuniy sotib yuborgani aniqlandi, deya “Daryo”ga xabar bermoqda Bosh prokuratura.
Qayd etilishicha, Bosh prokuratura huzuridagi Departamentning Zangiota tuman bo‘limi tomonidan tergovga qadar tekshiruv o‘tkazilgan.
Tekshiruvda tumandagi 2 ta fermer xo‘jaligi rahbari oldindan til biriktirib, qishloq xo‘jaligi mahsulotlari yetishtirish maqsadida ajratilgan sug‘oriladigan yer maydoni hisobidan 1,75 gektar yerni uy-joy qurish uchun 23 nafar fuqaroga, 3,2 gektarini esa “U” nomli MChJga qalbaki hujjatlarni tayyorlab taqdim etish orqali sotib yuborganliklari aniqlangan.
Mazkur holat yuzasidan Jinoyat kodeksining 168 (firibgarlik), 192-11-moddalari (nodavlat tijorat tashkilotida yoki boshqa nodavlat tashkilotida mansabdor shaxslar tomonidan o‘z vakolatlarini suiiste’mol qilish) va 228-moddasi (hujjatlar, shtamplar, muhrlar, blankalar tayyorlash, ularni qalbakilashtirish, sotish yoki ulardan foydalanish) bilan jinoyat ishi qo‘zg‘atilib, tergov harakatlari o‘tkazilmoqda.
Bundan avval Samarqandda o‘zini mansabdor ko‘rsatib, aldov yo‘li bilan fuqarodan 4 million so‘m talab qilgan ekologiya xodimi qo‘lga olingani, Buxoroda 23 sotix yerni rasmiylashtirishda yordam berish evaziga oldindan 100 dollar va 2 million so‘m olgan kadastr xodimiga jinoyat ishi qo‘zg‘atilgani hamda Buxoroda hujjatlarni soxtalashtirish orqali yer ajratish evaziga dehqondan pora olgan shaxs ushlangani haqida xabar berilgandi.
Izoh (0)