Xorazmda aka singlisini manzilga olib kelib qo‘ygan Damas haydovchisining hayotiga zomin bo‘ldi, deya xabar bermoqda Tergov departamenti.
Ma’lum qilinishicha, 2021-yil 15-fevral kuni soat 03:30 larda 30 yoshli D.D. Shovot tumani “Guliston” MFY hududida singlisi Damas rusumli avtomashinadan tushib qolganligini ko‘radi.
D.D. ularning yoniga borib, haydovchi, 36 yoshli X.Q. bilan janjallashib, yog‘och bo‘lagi bilan uning bosh qismiga urib, tan jarohati yetkazadi. X.Q. olgan tan jarohatlari oqibatida vafot etadi.
Mazkur holat yuzasidan Shovot tumani IIB huzuridagi tergov bo‘linmasi tomonidan D.D.ga nisbatan Jinoyat kodeksining 104-moddasi 3-qismi “d” bandi (jabrlanuvchining o‘lishiga sabab bo‘lgan qasddan badanga og‘ir shikast yetkazish) bilan jinoyat ishi qo‘zg‘atilib, qamoqqa olish tarzidagi ehtiyot chorasi qo‘llanilgan.
Hozirda tergov harakatlari olib borilmoqda.
Bundan avval Namanganda avtobus eshigiga qisilib qolishi oqibatida yerga yiqilgan yo‘lovchi vafot etgani hamda Samarqandda ota 6 yoshli farzandini bo‘g‘ib o‘ldirgani haqida xabar berilgandi.
Izoh (0)