Toshkentning Bektemir tumanida joylashgan Techno Continental MChJning metallni qayta ishlash sexi ishchisi chap qo‘l barmoqlarini kesib oldi.
IIV huzuridagi Tergov departamentining xabar berishicha, voqea 1-fevral kuni soat 06:30 larda yuz bergan. Ushbu korxonada ishlovchi 23 yoshli M.Y. metall kesish uchun mo‘ljallangan dastgohda xavfsizlik qoidalariga rioya qilgan holda ishlayotgan vaqtida chap qo‘l barmoqlarini kesib olgan.
Olib borilgan tergovga qadar tekshiruv harakatlari jarayonida Techno Continental MChJ mansabdor shaxslari tomonidan texnik qoidalar buzilganligi, ushbu dastgohda ishlash uchun yetarli xavfsizlik choralari ko‘rilmaganligi aniqlangan.
Sud tibbiy ekspertizasida ishchi og‘ir tan jarohatlari olganligi ko‘rsatilgan.
Holat yuzasidan Bektemir tumani bo‘yicha IIO FMB huzuridagi tergov bo‘linmasi tomonidan Techno Continental MChJ mansabdor shaxslariga nisbatan Jinoyat kodeksining 257-moddasi 1-qismi (mehnatni muhofaza qilish qoidalarini buzish) bilan jinoyat ishi qo‘zg‘atilib, tegishli ekspertizalar tayinlangan. Hozirda tergov davom etmoqda.
Korxonalar va tashkilotlarning yagona davlat reyestri ma’lumotlariga ko‘ra, Techno Continental 2018-yilning yanvarida ro‘yxatdan o‘tgan bo‘lib, korxona elektromaishiy qurilmalarni ishlab chiqarish bilan shug‘ullanadi. Korxona muassisi — Artel Electronics (62,5 foiz) va Ilk Sabah Insaat Anonim Sirketi (37,5 foiz).
2020-yilning noyabrida Yashnobod tumanida joylashgan korxonada yong‘in chiqib, bir necha kishi jarohat olgandi.
Izoh (0)