Toshkent hamda Samarqand viloyatida ehtiyotsizlik natijasida quduqqa tushib ketgan fuqarolar qutqarib olindi, deya xabar qilmoqda FVV.
Qayd etilishicha, 6-fevral kuni Toshkent viloyati Favqulodda vaziyatlar boshqarmasiga Toshkent tumani Sobir Rahimov jamoa xo‘jaligi, Shermatov ko‘chasi, 62-uyda istiqomat qiluvchi fuqaro Q.B.ning quduq ichiga tushib ketganligi to‘g‘risida xabar kelib tushgan.
Aniqlanishicha, hodisa Chirchiq shahrida joylashgan “Faxriy Baraka Servis” bog‘dorchilik—uzumchilik shirkatiga qarashli 18-dala hovlida fuqaro quduqdan suv chiqarish maqsadida, unga tushayotgan vaqtida oyog‘i sirpanib ketganligi tufayli sodir bo‘lgan. Oqibatda uning oyog‘i sinib, yuqoriga qaytib chiqa olmagan.
Murojaat yuzasidan qutqaruvchilar zudlik bilan voqea joyiga yetib borgan. Olib borilgan tezkor harakatlar natijasida fuqaro Q.B. quduq ichidan olib chiqilib, tez-tibbiy yordam xizmatiga topshirilgan.
Bundan tashqari, 16-fevral kuni tunda Samarqand shahri Bobur Mirzo ko‘chasidagi uylarning birida istiqomat qiluvchi fuqaro Favqulodda vaziyatlar vazirligining viloyat boshqarmasi navbatchilik qismiga uni chuqurlikdan chiqarib olishlarini so‘rab murojaat qilgan.
Leytenant N.Karimov boshchiligidagi qutqaruv guruhi zudlik bilan belgilangan manzilga yetib borib, besh daqiqa ichida uy egasini chuqurdan olib chiqqan.
Ma’lum bo‘lishicha, fuqaro R.S. tunda, hovlida yurgan vaqtida bir kun oldin o‘zi qazib qo‘ygan chuqurlikka tushib ketgan. Ta’kidlanishicha, uy egasi jiddiy jarohatlar olmagan.
Bundan avval Bo‘zsuv kanalida oqib ketayotgan odam, Jizzaxda chuqurligi 19 metr bo‘lgan quduqqa tushib ketgan 69 yoshli ayol hamda Andijonda daryo oqizib ketgan ikki shaxs qutqarib olingani haqida xabar berilgandi.
Izoh (0)