Amerikadagi Flat Out Autos atelyesining tyunerlari K5 Blazer yo‘ltanlamaslari uslubida yaratilgan to‘rtta bir xil Chevrolet Tahoe’ni qayta ishlash bo‘yicha buyurtma oldi. Har biri 69 ming dollar turadigan avtomobillar birgina xaridor tomonidan sotib olingan, deb xabar beradi Motor.
2019-yilda Amerikadagi atelyening mutaxassislari SEMA tyuning-shousi uchun maxsus K5 Blazer uslubidagi (1969—1994) noodatiy Chevrolet Tahoe’ni yaratgan edi. Loyiha ko‘rgazmaga tashrif buyurgan insonlarga shu qadar manzur bo‘lganki, tyunerlar darhol shu kabi bir nechta yo‘ltanlamaslarni yaratishga buyurtma olgan.
Hozirga qadar muhandislar tom qismi oq bo‘lgan to‘rtta bir xil ko‘k rangli yo‘ltanlamasni yaratgan. “Qayta ishlangan” modellar klassik doirasimon old optikaga, xromlangan bamperlar, yangi kapot, shuningdek, K5 Blazer dizaynini takrorlovchi uglerod toladan ishlangan yukxona eshigiga ega bo‘lgan. Tahoe’ni Blazer’dan ajratib turadigan yagona farq — to‘rt eshikli kuzov komponovkasi. Original yo‘ltanlamaslar ikki eshikli edi.
To‘rtta retroyo‘ltanlamaslarning barchasi bitta xaridor tomonidan sotib olingan. Har bir avtomobil uchun mijoz 69 ming dollardan to‘lagan. Ayni vaqtda amerikalik tyunerlar 1972-yilgi K5 Blazer uslubidagi sariq rangli Chevrolet Tahoe’ni yaratish bo‘yicha yana bitta buyurtma olgan.
Avvalroq yaponiyaliklar yangi Toyota RAV4 va eski Chevrolet Tahoe’ni “chatishtirgani” to‘g‘risida xabar berilgandi.
Mavzuga doir:
Izoh (0)