“AQSh hamkorlar bilan birgalikda JSSTni isloh qiladi” — Entoni Blinken

AQSh Jahon sog‘liqni saqlash tashkiloti (JSST)ni isloh qilish hamda ogohlantirish tizimini takomillashtirish bo‘yicha sheriklar bilan hamkorlik qilishga sodiqdir. Bu haqda 17-fevral, chorshanba kuni bo‘lib o‘tgan koronavirus pandemiyasiga qarshi kurash bo‘yicha ko‘rilgan choralar to‘g‘risidagi BMT Xavfsizlik Kengashi yig‘ilishida AQSh davlat kotibi Entoni Blinken ma’lum qildi, deya xabar bermoqda “TASS”.

“Biz JSSTni mustahkamlash va isloh qilish, sog‘liqni saqlashning global kun tartibini qo‘llab-quvvatlash, biologik tahdidlarga qarshi turg‘unlikni shakllantirish, tezkor javob berishimizga imkon beradigan ogohlantirish tizimini yaratish bo‘yicha butun dunyo bo‘ylab hamkorlar bilan ishlaymiz, bu odamlar hayotini saqlab qolish uchun zarur”, — dedi AQSh davlat kotibi.

Davlat kotibi koronavirusni yengish va kelajakda sodir bo‘ladigan pandemiyalarning oldini olish uchun sog‘liqni saqlashning eng mustahkam tuzilishini yaratish zarurligini ta’kidladi.

Uning qo‘shimcha qilishicha, Qo‘shma Shtatlar fevral oyining oxiriga qadar JSST budjetiga, taxminan, 200 million dollar qo‘shadi.

“Qo‘shma Shtatlar moliyaviy majburiyatlari doirasida JSSTga oy oxiriga qadar qariyb 200 million dollar o‘tkazmoqchi”, — dedi Davlat departamenti rahbari.

U ushbu qarorni pandemiyaga qarshi global javob choralarini ko‘ruvchi JSSTni qo‘llab-quvvatlash bo‘yicha AQShning majburiyatini aks ettiruvchi muhim qadam deb atadi.

Eslatib o‘tamiz, 2020-yil aprelda Tramp koronavirus pandemiyasi boshlangani uchun Jahon sog‘liqni saqlash tashkiloti (JSST)ni javobgar qildi. AQShning o‘sha vaqtdagi prezidenti fikricha, tashkilot virus Xitoyda paydo bo‘lganidan keyin uning dunyo bo‘ylab tarqalishiga yo‘l qo‘ymaslik vazifasini bajara olmagan. O‘shandayoq Tramp AQSh tomonidan JSSTga beriladigan moliyaviy yordamni muzlatib qo‘ydi, shungacha AQSh tashkilotning eng yirik donori bo‘lib, budjetining, taxminan, 15 foizini ta’minlab bergan.

Amerikaning amaldagi prezidenti Jo Bayden inauguratsiyadan bir necha soat o‘tgach, AQShni JSSTga qaytarish to‘g‘risidagi farmonni imzoladi.