АҚШнинг 45-президенти Дональд Трамп радиобошловчи Раш Лимбонинг вафоти муносабати билан Fox News телеканалида ҳамдардлик билдирди. Бу унинг давлат раҳбари лавозимидан кетганидан бери биринчи марта ОАВда пайдо бўлиши, деб хабар берди «Интерфакс».
«Атрофимизда афсоналар кўп эмас, лекин Раш Лимбо ҳақиқий афсона... У бу мамлакатни, Америка халқини жуда яхши кўрарди», — деди Трамп Fox News телеканалига. Трамп радиобошловчининг вафотидан уч-тўрт кун олдин у билан гаплашганини айтиб ўтди.
Раш Лимбо 70 ёшида ўпка саратонидан вафот этди. У АҚШ тарихидаги энг нуфузли медиашахслардан бири эди. У ўз дастурларида аҳолининг консерватив қарашли қатламлари манфаатларини ҳимоя қилган. Дональд Трамп Лимбони 2020 йилда Озодлик президенти медали билан тақдирлади. Радиобошловчи 2021 йил январь ойида Капитолига бостириб кирган иштирокчиларни Мустақиллик уруши қаҳрамонларига қиёслаган.
Аввалроқ собиқ президенти Дональд Трамп мамлакат сиёсий ҳаётидаги иштирокини тиклашни ва журналистлар билан яна мулоқот қилишни режалаштираётгани ҳақида хабар берилганди. Таъкидланишича, собиқ президент «унинг импичментини қўллаб-қувватлаган ёки ноябрдаги сайлов натижаларини бекор қилиш ҳаракатларига қаршилик кўрсатган республикачилардан қасос олишни истаяпти».
Январь ойида Дональд Трамп Флорида штатида ўз ваколатхонасини очган эди. У «собиқ президент девони» деб номланган. Девонхона Трампнинг ёзишмалари, оммавий баёнотлари ва нутқлари билан шуғулланади.
Изоҳ (0)