Тожикистонда ғарбий Помирдаги Фанлар академияси тоғ тизмасида жойлашган Корженевская чўққиси «Озоди» деб, «Озоди» чўққиси эса «Сангталак» деб қайта номланди. Бу ҳақда Тожикистон Тил ва атамашунослик қўмитаси раиси Олимжон Муҳаммаджонзода маълум қилди, деб ёзади Asia-Plus.
Унинг сўзларига кўра, 2020 йилда қўмита томонидан аҳоли пунктларининг 844 та ностандарт номлари кўриб чиқилган ва уларни ўзгартириш ҳақидаги ҳукумат қарорлари лойиҳаси тайёрланган.
Корженевская чўққиси (энди «Озоди» чўққиси) — Фанлар академияси тизмасининг шимолий қисмида, Исмоил Сомоний чўққисидан 13 км шимолда жойлашган 7105 метрлик тоғ ҳисобланади.
Чўққи 1910 йил 23 августида рус географи Николай Корженевский томонидан кашф қилинган, у чўққини ўз рафиқаси Евгения Корженевская шарафига номлаган.
«Озоди» чўққиси эса 2009 йилда Тожикистон президенти ташаббуси билан шундай номланган: унгача 6230 метрлик чўққи номсиз бўлган. Энди эса у «Сангталак» деб номланади.
Аввалроқ Тожикистондаги Сарез кўлида эҳтимолий фалокат ҳақида олдиндан огоҳлантириш тизими Ўзбекистон чегарасигача кенгайтирилиши хабар берилган эди.
Изоҳ (0)