AQSh hukumati hanuzgacha COVID-19 koronavirusining Xitoydagi laboratoriyada ishlab chiqilgani haqidagi farazni ilgari surishda davom etmoqda, deya xabar berdi NBC News.
Milliy razvedka boshqarmasining raisi agentlikning 2020-yil bahorda bergan bayonotidagi fikrlarda sobit ekanini bildirgan.
“AQSh razvedka idoralari bu boradagi axborotlarni diqqat bilan o‘rganadi va koronavirusning paydo bo‘lishi uning hayvondan odamga yuqishi bilan bog‘liqligi yoki Uxandagi laboratoriyada sun’iy ravishda ishlab chiqilganini aniqlaydi”, — deyilgan bayonotda.
Vashington shu tariqa Jahon sog‘liqni saqlash tashkiloti (JSST) ekspertlarining virus tabiiy sharoitlarda paydo bo‘lgani haqidagi taxminlariga qarshi chiqdi.
Telekanalda efirga berilgan lavhada AQSh razvedka idoralarining vakillari Pekinning koronavirus paydo bo‘lishi bilan bog‘liq axborotlarni yashirgani va infeksiya tarqalib ketishining oldini olish yuzasidan ishlarni amalga oshirmagani haiqda ma’lumotlarga egaligi aytilgan.
Biroq manbalar bergan axborotlar bo‘yicha yuqorida qayd etilgan hujjatlarda koronavirusning Uxandagi laboratoriyada ishlab chiqilgani xususidagi dalillar mavjud emas.
Qayd etilishicha, AQSh rasmiylari holatga aloqador, ya’ni koronavirusning Uxanda laborator sharoitda yaratilgani yuzasidan hech qanday dalilni oshkor etmagan. Ushbu masalani o‘rgangan olimlarning aksariyati mazkur taxminning haqiqatdan ancha uzoqligini aytib o‘tgan.
Avval JSST rahbarligidagi xalqaro guruh a’zosi, doktor Piter Daszak COVID-19 rivojlanishining ehtimoli yuqori bo‘lgan ssenariysi haqida gapirgan. Uning so‘zlariga ko‘ra, ko‘rshapalaklarga infeksiya yovvoyi hayvonlar fermasidan yuqqan, o‘z navbatida hayvonlardan ferma ishchilari yoki u yerdagi itlar, bo‘rsiqlar va boshqa jonivorlarga o‘tgan bo‘lishi mumkin. JSST ekspertlari COVID-19’ning odamga yuqishi bo‘yicha 4 xil versiyani ilgari surgan.
Izoh (0)