Kelib chiqishi Chechenistondan bo‘lgan shvetsiyalik UFC jangchisi Hamzat Chimayev oktagonga iyun oyida qaytishi mumkin.
Bu haqda Chimayevning menejeri Ali Abdulazizga tayanib, ESPN jurnalisti Brett Okamoto xabar qildi.
“Menejer Ali Abdulazizning so‘zlariga ko‘ra, Hamzat Chimayev Las-Vegasga uchib ketgan. AQShda unga tibbiy yordam ko‘rsatiladi. Abdulaziz Hamzatning iyun oyi jang o‘tkaza olishiga umid bildirishini aytdi. Biroq ayni damda eng asosiysi — bu sog‘liq”, — deya yozadi Okamoto o‘z Twitter’ida.
Chimayev Toshkent vaqti bilan 14-mart tongida bo‘lib o‘tadigan UFC musobaqasida Leon Edvardsga qarshi jang qilishi belgilangandi. Biroq Chimayevda koronavirus asoratlari og‘ir kechayotgani bois jang bekor qilingan.
Eslatib o‘tamiz, bunga qadar mazkur yakkakurashchilar o‘rtasidagi jang ikki bor qoldirilgandi. Avvaliga 19-dekabrga mo‘ljallangan jang Edvardsda virus aniqlangach, qoldirildi. 20-yanvar kungi jangga yaqin qolganda Chimayev infeksiyani yuqtirib oldi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)