Prezident Shavkat Mirziyoyev Namangan viloyatiga tashrifi davomida hududning Yangiqo‘rg‘on tumanida joylashgan Sura General investment bog‘ida ham bo‘ldi. Qayd etilishicha, Birlashgan Arab Amirliklarining 3 million dollar to‘g‘ridan to‘g‘ri xorijiy investitsiyasi hisobiga 103 gektar maydonda ushbu intensiv bog‘ barpo qilindi. “Daryo” muxbiri Mirolim Isajonov Sura General investment MChJ rahbari, BAAlik investor Abdulbariy Aymanga bir qancha savollar bilan yuzlanib, intervyu uyushtirdi.
– O‘zbekistonga investitsiya olib kirishingizga nima turtki bo‘ldi?
– Mamlakatingizga ilk marta 2019-yilda kelganman. O‘shanda Namangan shahrida xalqaro biznes forumi o‘tkazilgandi. Men forum doirasida o‘nlab loyihalar bilan tanishib, viloyatning o‘ziga xos tabiati, yeri, suvi, umuman, qishloq xo‘jaligi sohasi haqida ko‘proq ma’lumot olishga harakat qilganman. Yangiqo‘rg‘on tumani bahavo va salqin hudud bo‘lgani uchun e’tiborimni tortib, o‘ziga jalb qilgan. Italiyalik mutaxassislar Yangiqo‘rg‘onning tuprog‘i va suvi haqida ijobiy fikrlar aytib, ular ham shu tumani bizga tavsiya etishdi. Bundan tashqari, Shavkat Miromonovich davlat rahbari bo‘lganidan keyin O‘zbekistondagi o‘zgarishlar, tadbirkorlar va investorlarga nisbatan e’tibori sabab ham loyihamizni yurtingizda amalga oshirishga qaror qildik.
– Bog‘dorchilikka oid loyihalarni qachondan beri amalga oshirib kelasiz?
– Kompaniyamizning bosh ofisi Abu–Dabi shahrida joylashgan. Biz ko‘p yildan buyon birja, qurilish, IT kabi talabgor sohalarga taalluqli turli loyihalarni amalga oshirib, faoliyat yuritib kelamiz. Amerika, Turkiya kabi ko‘plab rivojlangan davlatlarga investitsiya kiritib, u yerlarda firmalar ochganmiz. Qishloq xo‘jaligi, xususan, bog‘dorchilik yo‘nalishidagi ilk loyihamizni O‘zbekistonda yo‘lga qo‘ydik. Bu biz uchun birinchi qadam bo‘ldi va oz bo‘lsa-da, tajriba orttirdik.
– Bu intensiv bog‘dan hosil olish qachonga rejalashtirilgan?
– O‘tgan yili Italiyadan ko‘chatlar olib kelinib, 48 gektarga gilos, 26 gektarga o‘rik, 22 gektarga shaftoli, 7 gektarga olxo‘ri ekildi. 250 metr chuqurlikdan suv chiqarildi. Qisqa vaqt ichida siz ko‘rib turgan ushbu hovuz qazildi va tomchilatib sug‘orish tizimi o‘rnatildi. 2022-yilda ilk hosilni olamiz va 2025-yildan boshlab daromadga kira boshlaymiz.
– Mahsulot qaysi davlatlarga eksport qilinishi ko‘zda tutilgan?
– Bog‘ning yillik quvvati 5 ming tonna bo‘lib, 4 million dollarlik mahsulotni eksport qilish rejalashtirilgan. Asosan, arab davlatlariga eksport qilish mo‘ljallangan.
– Kelgusidagi rejalaringiz qanday?
– Bizga viloyat va tuman rahbariyati tomonidan 300 gektar yer ajratildi. Uning 103 gektariga mazkur bog‘ni tashkil qildik. Kelgusida qolgan yerlarda ham bog‘dorchilik bo‘yicha katta-katta loyihalarni yo‘lga qo‘ymoqchimiz.
Shuni alohida aytishim kerakki, Namanganda orttirgan tajribamdan kelib chiqqan holda biz BAAdagi boshqa tadbirkorlarga ham buni targ‘ib qilyapmiz. 2021-yilning may oyida investorlarning katta guruhini olib kelishni rejalashtiryapman, ular pandemiya yumshashini kutmoqda. Yil oxirigacha amirliklarning O‘zbekistondagi qishloq xo‘jaligiga investitsiyasi hajmi juda katta bo‘ladi.
Bundan avval Toshkentdagi Do‘stlik bog‘i 49 yilga chet ellik investorga topshirilgani haqida xabar berilgandi.
Izoh (0)