Президент Шавкат Мирзиёев Наманган вилоятига ташрифи давомида ҳудуднинг Янгиқўрғон туманида жойлашган Sura General investment боғида ҳам бўлди. Қайд этилишича, Бирлашган Араб Амирликларининг 3 миллион доллар тўғридан-тўғри хорижий инвестицияси ҳисобига 103 гектар майдонда ушбу интенсив боғ барпо қилинди. «Дарё» мухбири Миролим Исажонов Sura General investment МЧЖ раҳбари, БААлик инвестор Абдулбарий Айманга бир қанча саволлар билан юзланиб, интервью уюштирди.
– Ўзбекистонга инвестиция олиб киришингизга нима туртки бўлди?
– Мамлакатингизга илк марта 2019 йилда келганман. Ўшанда Наманган шаҳрида халқаро бизнес форуми ўтказилганди. Мен форум доирасида ўнлаб лойиҳалар билан танишиб, вилоятнинг ўзига хос табиати, ери, суви, умуман, қишлоқ хўжалиги соҳаси ҳақида кўпроқ маълумот олишга ҳаракат қилганман. Янгиқўрғон тумани баҳаво ва салқин ҳудуд бўлгани учун эътиборимни тортиб, ўзига жалб қилган. Италиялик мутахассислар Янгиқўрғоннинг тупроғи ва суви ҳақида ижобий фикрлар айтиб, улар ҳам шу тумани бизга тавсия этишди. Бундан ташқари, Шавкат Миромонович давлат раҳбари бўлганидан кейин Ўзбекистондаги ўзгаришлар, тадбиркорлар ва инвесторларга нисбатан эътибори сабаб ҳам лойиҳамизни юртингизда амалга оширишга қарор қилдик.
– Боғдорчиликка оид лойиҳаларни қачондан бери амалга ошириб келасиз?
– Компаниямизнинг бош офиси Абу–Даби шаҳрида жойлашган. Биз кўп йилдан буён биржа, қурилиш, ИТ каби талабгор соҳаларга тааллуқли турли лойиҳаларни амалга ошириб, фаолият юритиб келамиз. Америка, Туркия каби кўплаб ривожланган давлатларга инвестиция киритиб, у ерларда фирмалар очганмиз. Қишлоқ хўжалиги, хусусан, боғдорчилик йўналишидаги илк лойиҳамизни Ўзбекистонда йўлга қўйдик. Бу биз учун биринчи қадам бўлди ва оз бўлса-да, тажриба орттирдик.
– Бу интенсив боғдан ҳосил олиш қачонга режалаштирилган?
– Ўтган йили Италиядан кўчатлар олиб келиниб, 48 гектарга гилос, 26 гектарга ўрик, 22 гектарга шафтоли, 7 гектарга олхўри экилди. 250 метр чуқурликдан сув чиқарилди. Қисқа вақт ичида сиз кўриб турган ушбу ҳовуз қазилди ва томчилатиб суғориш тизими ўрнатилди. 2022 йилда илк ҳосилни оламиз ва 2025 йилдан бошлаб даромадга кира бошлаймиз.
– Маҳсулот қайси давлатларга экспорт қилиниши кўзда тутилган?
– Боғнинг йиллик қуввати 5 минг тонна бўлиб, 4 миллион долларлик маҳсулотни экспорт қилиш режалаштирилган. Асосан, араб давлатларига экспорт қилиш мўлжалланган.
– Келгусидаги режаларингиз қандай?
– Бизга вилоят ва туман раҳбарияти томонидан 300 гектар ер ажратилди. Унинг 103 гектарига мазкур боғни ташкил қилдик. Келгусида қолган ерларда ҳам боғдорчилик бўйича катта-катта лойиҳаларни йўлга қўймоқчимиз.
Шуни алоҳида айтишим керакки, Наманганда орттирган тажрибамдан келиб чиққан ҳолда биз БААдаги бошқа тадбиркорларга ҳам буни тарғиб қиляпмиз. 2021 йилнинг май ойида инвесторларнинг катта гуруҳини олиб келишни режалаштиряпман, улар пандемия юмшашини кутмоқда. Йил охиригача амирликларнинг Ўзбекистондаги қишлоқ хўжалигига инвестицияси ҳажми жуда катта бўлади.
Бундан аввал Тошкентдаги Дўстлик боғи 49 йилга чет эллик инвесторга топширилгани ҳақида хабар берилганди.
Изоҳ (0)