Farg‘onada aliment to‘lovidan qarzdorligi bo‘lgan 10 353 nafar otaning respublika hududidan chetga chiqishi vaqtincha cheklangan. Bu haqda Majburiy ijro byurosining viloyat boshqarmasida o‘tkazilgan matbuot anjumanida ma’lum qilindi, deb xabar bermoqda “Daryo” muxbiri Azizjon Ermatov.
Ta’kidlanishicha, bugungi kunda viloyatda aliment undirish bilan bog‘liq 4175 ta ijro hujjati undiruvchi va qarzdorning o‘zaro kelishuvi asosida tamomlangan. Davlat ijrochilari tomonidan mahalla vakillari bilan hamkorlikda aliment to‘lovlarini undirish va oilalarni yarashtirish bo‘yicha ko‘rilgan choralar natijasida 3754 ta oila qayta tiklangan.
Aliment undirish bilan bog‘liq ijro hujjatlari bo‘yicha 34 milliard 302 million so‘m undirilib, voyaga yetmagan farzandlarning moddiy ta’minoti uchun o‘tkazib berilgan.
2020-yil davomida 838 nafar aliment to‘lashdan bo‘yin tovlagan shaxsga nisbatan sud qarorlari bilan ma’muriy qamoq tarzidagi jazo chorasi qo‘llanilgan. Bu choradan keyin ham 2 oydan ortiq muddat mobaynida aliment to‘lamagani uchun 35 nafar shaxsga nisbatan jinoyat ishi qo‘zg‘atilgan. 434 nafar qarzdorga nisbatan qidiruv e’lon qilingan. IIB xodimlari bilan hamkorlikda ularning 202 nafari ushlanib, qarzdorlik undirilgan.
Qayd etilishicha, O‘zbekiston Prezidentining 2020-yil 24-noyabrdagi tegishli farmoniga muvofiq, 6 ta yo‘nalishdagi ijro hujjatlari bo‘yicha undirilgan mablag‘larning 50 foizi “temir daftar”, “ayollar daftari” va “yoshlar daftari”ga kiritilgan aholini qo‘llab-quvvatlashga yo‘naltirilishi belgilangan. Shundan kelib chiqib, 2020-yil dekabr oyi davomida davlat foydasiga undirilgan 9 milliard 738 million so‘m mablag‘dan teng yarmi — 4 milliard 869 million so‘mi ehtiyojmand fuqarolarni qo‘llab-quvvatlash uchun yo‘naltirilishi ta’minlangan.
Izoh (0)