Фарғонада алимент тўловидан қарздорлиги бўлган 10 353 нафар отанинг республика ҳудудидан четга чиқиши вақтинча чекланган. Бу ҳақда Мажбурий ижро бюросининг вилоят бошқармасида ўтказилган матбуот анжуманида маълум қилинди, деб хабар бермоқда «Дарё» мухбири Азизжон Эрматов.
Таъкидланишича, бугунги кунда вилоятда алимент ундириш билан боғлиқ 4175 та ижро ҳужжати ундирувчи ва қарздорнинг ўзаро келишуви асосида тамомланган. Давлат ижрочилари томонидан маҳалла вакиллари билан ҳамкорликда алимент тўловларини ундириш ва оилаларни яраштириш бўйича кўрилган чоралар натижасида 3754 та оила қайта тикланган.
Алимент ундириш билан боғлиқ ижро ҳужжатлари бўйича 34 миллиард 302 миллион сўм ундирилиб, вояга етмаган фарзандларнинг моддий таъминоти учун ўтказиб берилган.
2020 йил давомида 838 нафар алимент тўлашдан бўйин товлаган шахсга нисбатан суд қарорлари билан маъмурий қамоқ тарзидаги жазо чораси қўлланилган. Бу чорадан кейин ҳам 2 ойдан ортиқ муддат мобайнида алимент тўламагани учун 35 нафар шахсга нисбатан жиноят иши қўзғатилган. 434 нафар қарздорга нисбатан қидирув эълон қилинган. ИИБ ходимлари билан ҳамкорликда уларнинг 202 нафари ушланиб, қарздорлик ундирилган.
Қайд этилишича, Ўзбекистон Президентининг 2020 йил 24 ноябрдаги тегишли фармонига мувофиқ, 6 та йўналишдаги ижро ҳужжатлари бўйича ундирилган маблағларнинг 50 фоизи «темир дафтар», «аёллар дафтари» ва «ёшлар дафтари»га киритилган аҳолини қўллаб-қувватлашга йўналтирилиши белгиланган. Шундан келиб чиқиб, 2020 йил декабрь ойи давомида давлат фойдасига ундирилган 9 миллиард 738 миллион сўм маблағдан тенг ярми — 4 миллиард 869 миллион сўми эҳтиёжманд фуқароларни қўллаб-қувватлаш учун йўналтирилиши таъминланган.
Изоҳ (0)