Farg‘onada 600 o‘rinli to‘yxona savdo majmuasiga aylantirildi

Farg‘ona viloyati Toshloq tumanidagi 600 o‘rinli to‘yxona savdo majmuasiga aylantirildi, deya xabar bermoqda O‘zA.

Ma’lum qilinishicha, Farg‘ona viloyati, Toshloq tumanida yashovchi tadbirkor Salimjon Qodirov bundan bir necha yil ilgari tuman markazida 600 o‘rinli “Oq oltin” to‘yxonasini barpo etgan.

Pandemiya davrida to‘ylar ixchamlashtirilib, katta hajmdagi to‘yxonalar faoliyatiga ehtiyoj kamaygani bois tadbirkor majmuani boshqa maqsadlar uchun o‘zgartirishga kirishdi.

Qayd etilishicha, sobiq to‘yxonada 50 ta savdo nuqtasi, yoshlar uchun o‘quv markazi tashkil qilindi. Majmua tashqarisida xizmat ko‘rsatish shoxobchalari qurildi.

Tadbirkor, shuningdek, tumanda chorvachilikka ixtisoslashgan “Muxtora MZXM” fermer xo‘jaligini tashkil etgan. Xo‘jalikning qayta ishlash sexida 10 turdagi sut va go‘sht mahsulotlari tayyorlanyapti. Shuningdek, bu yerda naslchilikni rivojlantirishga ham alohida e’tibor qaratilgan. Chorva kompleksiga Germaniya va Avstriyadan zotli mollar keltirilib, ko‘paytirilmoqda.

Bundan avval Korxonalarni sog‘lomlashtirish markaziga aylantiriladigan “Navro‘z” to‘yxonasining 1-qavatida ishsizlarga yordam ko‘rsatilishi haqida xabar berilgandi.