Koronavirus pandemiyasi oqibatida oziq-ovqat mahsulotlarining narxlari 2020-yilga nisbatan ko‘tarilgani sababli qashshoq davlatlarning 2021-yilda oziq-ovqat inqiroziga duch kelishi xavfi yanada ortmoqda. Bu haqda BMTning 2021-yil oziq-ovqat tizimlari sammiti bo‘yicha maxsus vakili Agnes Kalibataning The Guardian nashriga bergan intervyusiga asoslanib “RIA Novosti” ma’lum qildi.
“COVID-19 tufayli oziq-ovqat tizimida qisqarish bo‘ldi. Xususan, oziq-ovqat mahsulotlari qimmatlashdi, ba’zi joylarda esa odamlarning ularni sotib olishga ham imkoni bo‘lmadi. Bu yilgi oziq-ovqat masalasi o‘tmishga qaraganda ancha keskinlashdi”, — dedi maxsus vakil.
Kalibata asosiy zarba bozorlarga tushganini ta’kidladi. Karantin rejimining joriy etilishi tufayli oziq-ovqat bozorlari yopildi, bu esa dehqonlar ahvolining yomonlashishiga olib keldi.
Afrika mamlakatlari haqida gapirganda, maxsus vakil Keniya, Somali va Efiopiya kabi oziq-ovqat mahsulotlari narxining sezilarli darajada oshishi va oziq-ovqat tanqisligi bilan duch kelgan mamlakatlarning ahvoli kutilayotgan jiddiy qurg‘oqchilik mavsumi bilan murakkablashayotganini ta’kidladi.
Uning fikriga ko‘ra, 2020-yili oziq-ovqat tizimlari bosimga dosh bera oldi. Xususan, hukumatlar BMTning chegaralarni yopish yoki tariflarni o‘rnatishga yo‘l qo‘ymaslik to‘g‘risidagi tavsiyalarini hisobga oldi, yaxshi hosil yig‘ildi. Biroq o‘tgan bir yil ichida odamlar inqirozga oziq-ovqat, moliyaviy manbalar, qarindoshlarning yordami kabi o‘z resurslarini sarflagan holda dosh berdi. Endi ular inqirozga bunday qo‘llab-quvvatlashsiz duch keladi.
“Bu yil iqtisodiy tanazzul tufayli biz yanada jiddiy tahdidlarga duch kelmoqdamiz. Bu butun dunyoda, hamma joyda sodir bo‘lmoqda”, — deydi Kalibata.
Oziq-ovqat va qishloq xo‘jaligi tashkiloti (FAO) va BMTning Jahon oziq-ovqat dasturi (WFP) 2020-yil iyul oyida COVID-19 tufayli yuzaga kelishi mumkin bo‘lgan oziq-ovqat inqirozi xavfi ostida bo‘lgan 27 mamlakat qayd etilgan hisobotini e’lon qildi. Xalqaro ekspertlarning fikriga ko‘ra, global oziq-ovqat inqirozining dastlabki belgilari 20 yil ichida paydo bo‘lishi mumkin.
Bundan avval olimlar iqlim o‘zgarishi va COVID-19 kelib chiqishi o‘rtasidagi bog‘liqlikni aniqlagani hamda O‘zbekistonda 2 million so‘mdan kam pul topadiganlarning qariyb 60—70 foiz daromadi oziq-ovqatga sarflanishi haqida xabar berilgandi.
Izoh (0)