БМТ пандемия сабабли глобал озиқ-овқат танқислиги хавфи ҳақида огоҳлантирди

Коронавирус пандемияси оқибатида озиқ-овқат маҳсулотларининг нархлари 2020 йилга нисбатан кўтарилгани сабабли қашшоқ давлатларнинг 2021 йилда озиқ-овқат инқирозига дуч келиши хавфи янада ортмоқда. Бу ҳақда БМТнинг 2021 йил озиқ-овқат тизимлари саммити бўйича махсус вакили Агнес Калибатанинг The Guardian нашрига берган интервьюсига асосланиб «РИА Новости» маълум қилди.

«COVID-19 туфайли озиқ-овқат тизимида қисқариш бўлди. Хусусан, озиқ-овқат маҳсулотлари қимматлашди, баъзи жойларда эса одамларнинг уларни сотиб олишга ҳам имкони бўлмади. Бу йилги озиқ-овқат масаласи ўтмишга қараганда анча кескинлашди», — деди махсус вакил.

Калибата асосий зарба бозорларга тушганини таъкидлади. Карантин режимининг жорий этилиши туфайли озиқ-овқат бозорлари ёпилди, бу эса деҳқонлар аҳволининг ёмонлашишига олиб келди.

Африка мамлакатлари ҳақида гапирганда, махсус вакил Кения, Сомали ва Эфиопия каби озиқ-овқат маҳсулотлари нархининг сезиларли даражада ошиши ва озиқ-овқат танқислиги билан дуч келган мамлакатларнинг аҳволи кутилаётган жиддий қурғоқчилик мавсуми билан мураккаблашаётганини таъкидлади.

Унинг фикрига кўра, 2020 йили озиқ-овқат тизимлари босимга дош бера олди. Хусусан, ҳукуматлар БМТнинг чегараларни ёпиш ёки тарифларни ўрнатишга йўл қўймаслик тўғрисидаги тавсияларини ҳисобга олди, яхши ҳосил йиғилди. Бироқ ўтган бир йил ичида одамлар инқирозга озиқ-овқат, молиявий манбалар, қариндошларнинг ёрдами каби ўз ресурсларини сарфлаган ҳолда дош берди. Энди улар инқирозга бундай қўллаб-қувватлашсиз дуч келади.

«Бу йил иқтисодий таназзул туфайли биз янада жиддий таҳдидларга дуч келмоқдамиз. Бу бутун дунёда, ҳамма жойда содир бўлмоқда», — дейди Калибата.

Озиқ-овқат ва қишлоқ хўжалиги ташкилоти (ФАО) ва БМТнинг Жаҳон озиқ-овқат дастури (WFP) 2020 йил июль ойида COVID-19 туфайли юзага келиши мумкин бўлган озиқ-овқат инқирози хавфи остида бўлган 27 мамлакат қайд этилган ҳисоботини эълон қилди. Халқаро экспертларнинг фикрига кўра, глобал озиқ-овқат инқирозининг дастлабки белгилари 20 йил ичида пайдо бўлиши мумкин.

Бундан аввал олимлар иқлим ўзгариши ва COVID-19 келиб чиқиши ўртасидаги боғлиқликни аниқлагани ҳамда Ўзбекистонда 2 миллион сўмдан кам пул топадиганларнинг қарийб 60—70 фоиз даромади озиқ-овқатга сарфланиши ҳақида хабар берилганди.