Janubiy Koreya AstraZeneca vaksinasi bilan mamlakatdagi keksa fuqarolarni emlamaslikka qaror qildi. Bu haqda mahalliy Yonhap agentligi xabar berdi.
Janubiy Koreyada 26-fevraldan AstraZeneca ingliz-shved farmatsevtika kompaniyasining vaksinasi bilan emlash boshlanadi. Birinchi navbatda, aholining eng zaif guruhlari, jumladan, qariyalar uyi, sanatoriy hamda reabilitatsiya markazlari xodimlari va ularda davolanayotgan insonlar emlanadi.
Janubiy Koreya hukumati fevral-mart oylarida 760 ming tibbiyot xodimi va qariyalarni emlashni rejalashtirgan. Biroq hukumatning 65 yoshdan oshgan fuqarolarni vaqtincha emlamaslik to‘g‘risidagi qarori tufayli ushbu reja buzilishi mumkin, deyiladi xabarda. Janubiy Koreya Oziq-ovqat va dori-darmon xavfsizligi vazirligi AstraZeneca kompaniyasining vaksinasini ma’qullagandi.
Avvalroq Ispaniya ham AstraZeneca vaksinasini keksalar uchun qo‘llashdan bosh tortgandi, faqat 55 yoshgacha bo‘lgan ispaniyaliklar vaksinani qabul qiladi. Mamlakat Sog‘liqni saqlash vazirligi shu tariqa Yevropaning boshqa davlatlari shifokorlarining tavsiyalarini ma’qullagan: ular keksa yoshdagi bemorlarda mazkur vaksinaning samaradorligi va xavfsizligi to‘g‘risida ma’lumotlar yetarli emas deb hisoblaydi.
Eslatib o‘tamiz, nemis mutaxassislari AstraZeneca vaksinasini 65 yoshdan oshganlarga tavsiya etmagan. Mutaxassislarning ta’kidlashicha, 65 yoshdan oshganlar uchun preparatning samarali ekaniga oid dalillar yetarli emas. Kompaniya esa ushbu ma’lumotlarni “mutlaqo noto‘g‘ri” deb atagan hamda Buyuk Britaniyaning vaksinatsiya va immunizatsiya bo‘yicha birlashgan qo‘mitasi tomonidan AstraZeneca’ni keksalarda qo‘llash ma’qullangani va emlanganlarda immunitet miqdori ortayotganini ta’kidlagan.
Izoh (0)