Жанубий Африкада жойлашган Гвинеяда 2016 йилдан бери биринчи марта Эболадан камида тўртта ўлим ҳолати қайд этилди. Бу ҳақда мамлакат Соғлиқни сақлаш вазирлиги раҳбари Реми Ламахга таяниб «РБК» хабар берди.
«Биз жуда хавотирдамиз. Жануби-шарқий провинция Нзерекореда Эбола геморрагик иситмасидан тўртта ўлим ҳолати қайд этилди», — деган у.
Кейинчалик Жаҳон соғлиқни сақлаш ташкилоти (ЖССТ) бош директори Тедрос Гебрейесус ташкилот Гвинеяда Эбола билан касалланиш гумон қилинган икки ҳолат аниқланганлиги ҳақида Twitter’даги саҳифасида хабар берди. «Ҳозирда тест текшируви олиб борилмоқда», — деб ёзган Тедрос Гебрейесус.
Маълумот учун, Эбола вируси одам ва ҳайвонларга таъсир қилувчи ўткир инфекцияни келтириб чиқаради. Касаллик биринчи марта 1976 йилда аниқланган. Ушбу вирусли касаллик 2013—2016 йилларда Ғарбий Африкада жуда кенг тарқалиб кетди. Гвинеяда бошланган касаллик Либерия ва Сьерра-Леонега ҳам ўтиб кетди. Касалликнинг ўзига хос хавфли жиҳати унда касалланганлар орасида ўлим ҳолатининг юқорилигидадир. Ўша пайтда 11 315 киши ёки касалларнинг 50 фоизи вафот этган. 2019 йилнинг июль ойида Конгода қайд этилганидан кейин ЖССТ халқаро фавқулодда ҳолат эълон қилган. Мамлакатда касаллик пайдо бўлганидан буён 2200 киши вафот этган.
2020 йил ёзида Конгода Эбола эпидемияси юз берган, ушбу вирус билан 12 киши касалланганди.
Изоҳ (0)