Deyarli barcha davrlarda O‘zbekistonda futzalga unchalik katta e’tibor qaratilmagan. Tashkil etilgan jamoalar esa yo qaysidir tashkilot, yo qaysidir futbol klubi muassisligida faoliyat yuritgan. Milliy chempionat bahslari, umuman, mavsumlar ham ortiqcha shov-shuvlarsiz o‘tkazib yuboriladi. Shunga qaramay O‘zbekiston futzal terma jamoasi doimo Osiyoda o‘z o‘rniga ega bo‘lib kelgan va yetakchilar qatorida tilga olinadi. Hatto (futbol jamoasidan farqli o‘laroq) o‘zbekistonlik futzalchilar 2016-yili Kolumbiyada bo‘lib o‘tgan Jahon chempionati bahslarida ham ishtirok etishga muvaffaq bo‘lgandi. “Daryo” muxbiri Bilol Erkin O‘zbekistonning bugungi kundagi eng yaxshi o‘yinchilaridan biri Davron Choriyev (1993-yilda tug‘ilgan, “Ardus”, OKMK va O‘zbekiston terma jamoasidagi o‘yinlari bilan yaxshi tanilgan) bilan bog‘lanib, undan ushbu sportga qanday kirib kelgani, nima sababdan chet elga ketmasligi, kelgusidagi rejalari, O‘zbekistondagi futzalning darajasi, u yerdagi maoshlar va bir qator boshqa mavzular haqida suhbatlashdi.
— Suhbatni bolaligingizdan boshlasak, futzalga kirib kelishingiz qanday kechgan? Ilk qadamlar futboldan boshlangan bo‘lsa kerak?
— Futzalga men ham ko‘pchilik futzalchilarimiz singari katta futboldan kirib kelganman, 7 yoshimdan futbolga qatnashishni boshlaganman, 15 yoshimda jarohat sababli (oyog‘im singandi o‘shanda) oila a’zolarim futbolga ruxsat berishmagan, ammo baribir qiziqish kuchli bo‘lgani uchun futbol o‘yinlaridan qolmaslikka harakat qilardim, orada akam Dilshod Rahmatov (akam ham futzalchi, yoshligidan shug‘ullanadi) futzalga qatnashishni boshladi, men ham akamga qo‘shilib, mashg‘ulotlarga kelardim, ko‘rib kuzatardim. Dastlab havaskorlar jamoasidan boshlaganman, “Toshkent Siti” deb nomlanardi jamoamiz, hozirda esa OKMK futzal jamoasidaman.
— Yosh bolakaylarning futzalga qiziqishi va katta bo‘lsam futzalchi bo‘laman deyishlari uchun nima qilish kerak?
— Futzalga yoshlarni jalb qilish uchun birinchi navbatda futzal maktablari kerak deb o‘ylayman, lekin hozirda futzalga e’tibor kuchaymoqda, tez orada bu muammolar hal bo‘ladi degan umiddaman.
— O‘rtamiyona futzalchining maoshi bilan oila boqish mumkinmi? Sir bo‘lmasa, futzalchilar o‘rtacha qancha maosh oladi?
— Maosh masalasimi (kuladi)? Albatta, yetadi deb o‘ylayman. Hozirda futzalchilar 1 oyda o‘rtacha 5 million so‘m maosh oladi, lekin hamma joyda ham emas, albatta.
— Umuman, bizdagi futzalning darajasi qanday? Uni ommalashtirish uchun qanday ishlar qilinishi kerak?
— Umuman olganda, futzalimiz hozir yaxshi darajada, uni ommalashtirish uchun hamma ishlar qilinyapti deb o‘ylayman, o‘yinlarimiz “Sport TV” telekanalida jonli efirda namoyish etilmoqda, bu ham futzalning rivoji uchun katta natija deb o‘ylayman.
— Reyting bo‘yicha Osiyoda 3-o‘rinda turar ekanmiz. Agar ushbu sportga yaxshiroq e’tibor qaratilsa, bundan-da yaxshiroq natijalarga erishish mumkinmi?
— Albatta, e’tibor yanada kuchaytirilsa, natija ham bundan-da yaxshi bo‘ladi.
— Ko‘pchilik sizni terma jamoadagi faoliyatingiz orqali biladi. Klublar o‘rtasidagi milliy chempionat bahslariga nega e’tibor kam?
— Ha, e’tibor kam juda past edi, hozirda kuchaymoqda.
— Shu vaqtgacha bir necha marotaba klub almashtirdingiz. Bu jarayon qanday amalga oshadi? Bu yerda ham futboldagi kabi agentlar bormi?
— Futzalda asosan o‘yinchilar va murabbiylar o‘zaro kelishgan holda transferlar amalga oshiriladi.
— O‘zbekistonning eng yaxshi futzalchilaridan biri sifatida sizga chet eldan takliflar bo‘lganmi?
— Chet yeldan takliflar bo‘lgan, haligacha bo‘lib turibdi.
— Nega ketmaysiz, tajriba orttirib kelmaysizmi, chet elda maoshlar ham yaxshi bo‘lsa kerak?
— Takliflar moliyaviy taraflama yaxshi emas, shuning uchun. Shu yerda oladigan puldan ozgina ko‘proq berishadi.
— Bir necha yil ilgari ispaniyalik Xose Mariya Mendez terma jamoamizni boshqargandi. U futzalimizga nimalar bergan?
— Xose Mariya Mendez futzalimizda o‘rni katta inson, kuchli murabbiy. U olib kirgan futzal bizda haligacha o‘z mevasini bermoqda deb aytish mumkin.
— Argentina terma jamoasi bilan 2 ta o‘rtoqlik o‘yini o‘tkazildi. Bunday o‘yinlar nimasi bilan ahamiyatli?
— Argentina darajasidagi jamoalar bilan o‘yinlar har taraflama katta tajriba bo‘lib xizmat qiladi. O‘yinchilarning o‘ziga bo‘lgan ishonchi ortadi.
— Terma jamoa qanday shakllantiriladi, jamoada raqobat qay darajada, yoshlar kam emasmi?
— Terma jamoani asosan murabbiylar shakllantiradi. Raqobat juda kuchli. O‘ylashimcha, hozirda yosh futzalchilar borasida hech qanday muammo yo‘q.
— Yaqin bir necha yil ichidagi rejalaringiz qanday? Necha yoshgacha faoliyatingizni davom ettirmoqchisiz?
— Rejalarim, milliy chempionatimizda chempion bo‘lish va, albatta, sentabr oyida bo‘lib o‘tadigan Jahon chempionatida munosib ishtirok etish. Faoliyatimga kelsam, uzoq qolmayman deb o‘ylayman (kuladi).
Izoh (0)