Professional boksning super o‘rta vazn (-76,2 kg) toifasida ringga chiqayotgan o‘zbekistonlik Bektemir Meliqo‘ziyev (7-0, 6 KO) 14-fevral, yakshanba tongida o‘zining navbatdagi jangini o‘tkazdi.
AQShda bo‘lib o‘tgan ushbu jangda Bektemirga mezbon sportchi Morgan Fitch (19-5-1, 8 KO) raqiblik qildi. Jang 8 raundga mo‘ljallangandi. Biroq to‘qnashuv 3-raunddayoq yakuniga yetdi. Bektemir dastlabki ikki raundda Fitchning tana qismiga og‘riqli zarbalar yo‘lladi. Uchinchi raundda esa o‘zbekistonlik bokschining raqibning tana qismiga yo‘llagan navbatdagi zarbasi chuqur nokaut holati uchun yetarli bo‘ldi
Shu tariqa Bektemir Meliqo‘ziyev professional boksdagi yettinchi jangdagi yettinchi g‘alabasini tantana qildi. Fitch uchun esa bu faoliyatidagi beshinchi mag‘lubiyat bo‘ldi. Jang videosini bu yerda tomosha qilish mumkin — video.
Eslatib o‘tamiz, mazkur musobaqada yana bir o‘zbekistonlik bokschi Elnur Abduraimov ham jang qilishi belgilangandi. Biroq uning raqibi Deyvi Xulio belgilangan muddatga qadar komissiya tasdig‘idan o‘ta olmagani bois jang bekor qilingan.
Kaliforniya shtati, Indio shahridagi Fantasy Springs Resort Casino majmuasida tashkil etiladigan boks oqshomining asosiy jangi ikkinchi yarim yengil vazn toifasi (-58,9 kg) vakillari Jozef Dias (31-1, 15 KO) hamda asli tojikistonlik Shavkat Rahimov (15-0, 12 KO) o‘rtasida kechadi.
Eslatib o‘tamiz, Bektemir Meliqo‘ziyev aslida 30-yanvar kuni yarim og‘ir vazn toifasida WBA Super, IBF, WBO chempionlik kamarlarining sobiq sohibi, rossiyalik Sergey Kovalyov (34-4-1, 29 KO) bilan jang qilishi lozim edi. Biroq Kovalyovda doping aniqlangani bois jang bekor qiligandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)