Деярли барча даврларда Ўзбекистонда футзалга унчалик катта эътибор қаратилмаган. Ташкил этилган жамоалар эса ё қайсидир ташкилот, ё қайсидир футбол клуби муассислигида фаолият юритган. Миллий чемпионат баҳслари, умуман, мавсумлар ҳам ортиқча шов-шувларсиз ўтказиб юборилади. Шунга қарамай Ўзбекистон футзал терма жамоаси доимо Осиёда ўз ўрнига эга бўлиб келган ва етакчилар қаторида тилга олинади. Ҳатто (футбол жамоасидан фарқли ўлароқ) ўзбекистонлик футзалчилар 2016 йили Колумбияда бўлиб ўтган Жаҳон чемпионати баҳсларида ҳам иштирок этишга муваффақ бўлганди. «Дарё» мухбири Билол Эркин Ўзбекистоннинг бугунги кундаги энг яхши ўйинчиларидан бири Даврон Чориев (1993 йилда туғилган, «Ардус», ОКМК ва Ўзбекистон терма жамоасидаги ўйинлари билан яхши танилган) билан боғланиб, ундан ушбу спортга қандай кириб келгани, нима сабабдан чет элга кетмаслиги, келгусидаги режалари, Ўзбекистондаги футзалнинг даражаси, у ердаги маошлар ва бир қатор бошқа мавзулар ҳақида суҳбатлашди.
— Суҳбатни болалигингиздан бошласак, футзалга кириб келишингиз қандай кечган? Илк қадамлар футболдан бошланган бўлса керак?
— Футзалга мен ҳам кўпчилик футзалчиларимиз сингари катта футболдан кириб келганман, 7 ёшимдан футболга қатнашишни бошлаганман, 15 ёшимда жароҳат сабабли (оёғим синганди ўшанда) оила аъзоларим футболга рухсат беришмаган, аммо барибир қизиқиш кучли бўлгани учун футбол ўйинларидан қолмасликка ҳаракат қилардим, орада акам Дилшод Раҳматов (акам ҳам футзалчи, ёшлигидан шуғулланади) футзалга қатнашишни бошлади, мен ҳам акамга қўшилиб, машғулотларга келардим, кўриб кузатардим. Дастлаб ҳаваскорлар жамоасидан бошлаганман, «Тошкент Сити» деб номланарди жамоамиз, ҳозирда эса ОКМК футзал жамоасидаман.
— Ёш болакайларнинг футзалга қизиқиши ва катта бўлсам футзалчи бўламан дейишлари учун нима қилиш керак?
— Футзалга ёшларни жалб қилиш учун биринчи навбатда футзал мактаблари керак деб ўйлайман, лекин ҳозирда футзалга эътибор кучаймоқда, тез орада бу муаммолар ҳал бўлади деган умиддаман.
— Ўртамиёна футзалчининг маоши билан оила боқиш мумкинми? Сир бўлмаса, футзалчилар ўртача қанча маош олади?
— Маош масаласими (кулади)? Албатта, етади деб ўйлайман. Ҳозирда футзалчилар 1 ойда ўртача 5 миллион сўм маош олади, лекин ҳамма жойда ҳам эмас, албатта.
— Умуман, биздаги футзалнинг даражаси қандай? Уни оммалаштириш учун қандай ишлар қилиниши керак?
— Умуман олганда, футзалимиз ҳозир яхши даражада, уни оммалаштириш учун ҳамма ишлар қилиняпти деб ўйлайман, ўйинларимиз «Спорт ТВ» телеканалида жонли эфирда намойиш этилмоқда, бу ҳам футзалнинг ривожи учун катта натижа деб ўйлайман.
— Рейтинг бўйича Осиёда 3-ўринда турар эканмиз. Агар ушбу спортга яхшироқ эътибор қаратилса, бундан-да яхшироқ натижаларга эришиш мумкинми?
— Албатта, эътибор янада кучайтирилса, натижа ҳам бундан-да яхши бўлади.
— Кўпчилик сизни терма жамоадаги фаолиятингиз орқали билади. Клублар ўртасидаги миллий чемпионат баҳсларига нега эътибор кам?
— Ҳа, эътибор кам жуда паст эди, ҳозирда кучаймоқда.
— Шу вақтгача бир неча маротаба клуб алмаштирдингиз. Бу жараён қандай амалга ошади? Бу ерда ҳам футболдаги каби агентлар борми?
— Футзалда асосан ўйинчилар ва мураббийлар ўзаро келишган ҳолда трансферлар амалга оширилади.
— Ўзбекистоннинг энг яхши футзалчиларидан бири сифатида сизга чет элдан таклифлар бўлганми?
— Чет елдан таклифлар бўлган, ҳалигача бўлиб турибди.
— Нега кетмайсиз, тажриба орттириб келмайсизми, чет элда маошлар ҳам яхши бўлса керак?
— Таклифлар молиявий тарафлама яхши эмас, шунинг учун. Шу ерда оладиган пулдан озгина кўпроқ беришади.
— Бир неча йил илгари испаниялик Хосе Мария Мендез терма жамоамизни бошқарганди. У футзалимизга нималар берган?
— Хосе Мария Мендез футзалимизда ўрни катта инсон, кучли мураббий. У олиб кирган футзал бизда ҳалигача ўз мевасини бермоқда деб айтиш мумкин.
— Аргентина терма жамоаси билан 2 та ўртоқлик ўйини ўтказилди. Бундай ўйинлар нимаси билан аҳамиятли?
— Аргентина даражасидаги жамоалар билан ўйинлар ҳар тарафлама катта тажриба бўлиб хизмат қилади. Ўйинчиларнинг ўзига бўлган ишончи ортади.
— Терма жамоа қандай шакллантирилади, жамоада рақобат қай даражада, ёшлар кам эмасми?
— Терма жамоани асосан мураббийлар шакллантиради. Рақобат жуда кучли. Ўйлашимча, ҳозирда ёш футзалчилар борасида ҳеч қандай муаммо йўқ.
— Яқин бир неча йил ичидаги режаларингиз қандай? Неча ёшгача фаолиятингизни давом эттирмоқчисиз?
— Режаларим, миллий чемпионатимизда чемпион бўлиш ва, албатта, сентябрь ойида бўлиб ўтадиган Жаҳон чемпионатида муносиб иштирок этиш. Фаолиятимга келсам, узоқ қолмайман деб ўйлайман (кулади).
Изоҳ (0)