Samsung kompaniyasi o‘zining yangi Galaxy F62 smartfoniga oid yangi posterni e’lon qildi. Undan ko‘rish mumkinki, qurilma ulkan akkumulyator batareyasiga ega bo‘ladi, deb yozadi IXBT.
Ma’lum qilinishicha, Samsung Galaxy F62 sig‘imi 7000 mA/soatga teng akkumulyatorga ega bo‘ladi. Shu bilan birga, Janubiy Koreyaning texnologik giganti qurilmaning tezkor quvvatlanish imkoniyatini hozircha tasdiqlagani yo‘q.
Yangi qurilmaning taqdimoti tez kunlarda bo‘lib o‘tadi. Avvalroq o‘rta sinfga kiruvchi ushbu smartfon flagmanlar darajasidagi bir kristalli tizim bilan jihozlangani ma’lum bo‘lgandi. Taxminlarga ko‘ra, gap Exynos 9825 mobil platformasi haqida ketmoqda.
Mish-mishlarga ko‘ra, Galaxy F62 FHD+ sifatni qo‘llab-quvvatlovchi 6,7 dyuymli AMOLED displey, shuningdek, yon tomonida barmoq izi skaneriga ega bo‘ladi. Galaxy F62’ning tezkor xotirasi 8 gigabaytni, ichki xotirasi esa 128 gigabaytni tashkil etadi. Qutidan olinishi bilan smartfon Android 11 operatsion tizimida boshqariladi. Selfi uchun 32 megapikselli kamera o‘rnatilgan, asosiy kvadrokamera esa 64 megapikselni tashkil etadi.
Hamyonbop qurilma 340 dollar qiymatida sotuvga chiqishi kutilmoqda.
Mavzuga doir: Samsung Galaxy S21 bir haftadan ortiq suv ostida yotdi. Smartfon qanchalik o‘zgarishga uchradi?
Izoh (0)