Rossiyaning Mobile Inform Group kompaniyasi Android 10 operatsion tizimida ishlaydigan MIG S6 sanoat smartfonining yangi versiyasi sotuvga chiqqanini e’lon qildi, deb xabar beradi IXBT.
Aftidan, bu 2020-yili taqdim etilgan MIG S6 smartfonining biroz yangilangan va yangi operatsion tizim o‘rnatilgan versiyasi hisoblanadi. Kiritilgan o‘zgartirishlar qatoridan — tushunarli interfeys o‘rin olgan, shuningdek, tungi rejim va batareya sozlamalarining yaxshilanishi hisobiga avtonomligi oshirilgan.
Smartfonning chakana savdodagi tavsiya etilgan narxi 83 914 rubl (1135 dollar). Taqqoslash uchun: Samsung Galaxy S21 narxi 74 990 rubldan (1015 dollar), iPhone 12 esa 79 990 rubldan (1080 dollar) boshlanadi.
2020-yilgi MIG S6 modeli ancha arzon narxda sotuvga chiqqandi (69 ming rubl), biroq uning himoya darajasi biroz pastroq edi. Masalan, namlik va changdan himoya qilish standarti IP67’dan IP68’ga oshgan, shuningdek, smartfon uchqun chiqishiga qarshi sertifikatga ega bo‘lgan va undan portlovchi muhitda ham foydalanish mumkin.
Ishlab chiqaruvchining va’da qilishicha, MIG’ning barcha qurilmalari Android 10 operatsion tizimidagi ARM arxitekturasida 2021-yilning ikkinchi choragiga qadar sotuvga chiqadi.
MIG S6’ga piksellari soni 1440 x 720 bo‘lgan 6 dyuymli ekran o‘rnatilgan, kameralari 5 va 13 megapiksel, akkumulyator sig‘imi 5000 mA/soat. Qurilma asosini SoC Qualcomm Snapdragon 450 (3 Gb tezkor va 32 Gb ichki xotira) tashkil etadi. Bundan tashqari, smartfon 4G LTE aloqa tarmog‘ini qo‘llab-quvvatlaydi, ikkita SIM-karta bilan ishlay oladi, Bluetooth 4.2, NFC, GPS+GLONASS, USB Type-C mavjud. O‘lchami 162x82x14 millimetr, og‘irligi — 230 gramm.
Izoh (0)