“O‘zbekiston temir yo‘llari” yangi yo‘nalishlarda poyezdlar qatnovini yo‘lga qo‘ymoqda. Bu haqda kompaniya matbuot xizmati xabar berdi.
Qayd etilishicha, yangi yo‘nalishlar “O‘zbekiston Respublikasida ichki va ziyorat turizmini yanada rivojlantirish chora-tadbirlari to‘g‘risida”gi Prezident farmoni ijrosini ta’minlash hamda yo‘lovchilarga yanada qulaylik yaratish maqsadida yo‘lga qo‘yilmoqda.
Jumladan, 2021-yilning 15-fevral kunidan boshlab Andijon—Nukus—Andijon yo‘nalishida, 18-fevraldan boshlab esa Termiz—Xiva—Termiz yo‘nalishida 684/683-sonli yo‘lovchi poyezdlari qatnovi boshlanadi.
Shu munosabat bilan quyidagi yo‘nalishlarda harakatlanadigan poyezdlarning harakat jadvaliga o‘zgartirish kiritiladi:
- 14-fevraldan 93-sonli Andijon—Toshkent;
- 17-fevraldan 84/83-sonli Toshkent—Termiz—Toshkent;
- 19-fevraldan 656-sonli Andijon—Xiva;
- 20-fevraldan 6434-sonli Urganch—Pitnak;
- 21-fevraldan 398-sonli Andijon—Xiva.
Shuningdek, ko‘rsatilgan yo‘nalishlar bo‘yicha aviareyslarni va temiryo‘l qatnovlarini, shuningdek, Toshkent shahridan Buxoro, Nukus, Termiz va Urganch shaharlari hamda Farg‘ona vodiysiga qatnov yo‘nalishlari bo‘yicha aviareyslarni subsidiyalash nazarda tutilgan.