Samarqandda ishlab chiqarish bilan bog‘liq ikkita baxtsiz hodisa o‘lim bilan tugagan, ammo halok bo‘lganlarning oila a’zolariga kompensatsiya pullari to‘lanmayapti, deb xabar bermoqda Zarnews.
Ma’lum qilinishicha, 2021-yilning 2-yanvaridan 3-yanvarga o‘tar kechasi, soat taxminan 00:00 lar atrofida Samarqand shahar 4-umumiy o‘rta ta‘lim maktabi qozonxonasida ishlab chiqarish bilan bog‘liq baxtsiz hodisa sodir bo‘lgan. Oqibatda hodisa o‘t yoquvchining o‘limi bilan tugagan.
13-yanvar kuni esa soat taxminan 10:00 da Samarqand shahar obodonlashtirish boshqarmasi ishchisi o‘z xizmat vazifasini bajarish vaqtida halok bo‘lgan.
Hodisa Samarqand shahar, Hujum ko‘chasi, “Samarqand–Singapur” xorijiy korxonasi ro‘parasida “Shaar” tashlama arig‘ining quyi qismida yopiq holatda o‘tgan quvur ichini maishiy chiqindilardan tozalash vaqtida sodir bo‘lgan. Obodonlashtirish boshqarmasi xodimi quvurga kirib, quyi qismida ishlayotgan vaqtda to‘satdan yuqoridan maishiy chiqindi va suv kelib qolishi oqibatida suv ostida qolib, voqea joyida halok bo‘lgan.
Kasaba uyushmalari federatsiyasi mehnat inspeksiyasining mehnat-huquq va texnik inspektorlarining ma’lum qilishicha, har ikki holat bo‘yicha bugungi kunga qadar marhumning oilasiga bir marta biryo‘la to‘lanadigan nafaqa to‘lab berilmagan. Shuningdek, boquvchisini yo‘qotganlik tufayli oyma-oy tovon puli nafaqasi ham tayinlanmagan.
Ma’lumot uchun, Mehnat kodeksining 192 va 193-moddalarida xodimning vafoti munosabati bilan uning qaramog‘ida bo‘lgan shaxslarga zarar to‘lovlari to‘lanishi lozimligi belgilangan.
Xodim mehnatda mayib bo‘lishi, kasb kasalligi yoki mehnat vazifalarini bajarish bilan bog‘liq holda sog‘lig‘iga boshqacha tarzda shikast yetishi sababli vafot etgan hollarda ish beruvchi marhumning qaramog‘ida bo‘lgan mehnatga qobiliyatsiz shaxslarga, shuningdek, 16 yoshga to‘lmagan yoki u vafot etgan kunga qadar undan ta’minot olish huquqiga ega bo‘lgan shaxslarga, marhumning vafotidan keyin tug‘ilgan farzandiga, shuningdek, ota-onasidan biriga, umr yo‘ldoshiga yoki oilaning boshqa a’zosiga, agar u ishlamasdan marhumning uch yoshga yetmagan bolalari (ukalari, singillari) yoki nevaralarining parvarishi bilan band bo‘lsa, zararni to‘lashi shart.
Vafot etgan boquvchining qaramog‘ida bo‘lgan va uning vafoti munosabati bilan zararni undirishga haqli bo‘lgan mehnatga qobiliyatsiz shaxslarga to‘lanadigan zarar miqdori marhumning o‘rtacha oylik ish haqi miqdorida, uning o‘ziga va uning qaramog‘ida bo‘lgan, lekin zararni undirishga haqli bo‘lmagan mehnatga qobiliyatsiz shaxslarning ulushini chegirib tashlagan holda belgilanadi.
Izoh (0)