Buxoro viloyatining Qorako‘l tumanida faoliyat yuritayotgan 40 nafar patronaj hamshiraga hududga chiqib faoliyat yuritishi uchun velosiped berildi. Bu haqda “Daryo”ga tuman hokimligi axborot xizmati rahbari Rabbonaqul Muxtorov xabar qildi.
Ta’kidlanishicha, tuman hokimligi tashabbusi bilan 40 nafar patronaj hamshiraga velosiped sovg‘a qilingan. Bundan tashqari, umumiy qiymati 180 million so‘m bo‘lgan 60 ta zamonaviy planshet, tarozi, pulsoksimetr, tonometr-fonendaskop kabi tibbiy jihozlar ham ajratilgan.
“Patronaj hamshiralarga zarur jihozlar va velosiped berilgani ularning xizmat vazifasini yanada yaxshi bajarishi uchun imkoniyat yaratadi. Endi ular har kuni 6-7 kilometr uzoq masofadan piyoda qatnamaydi va transport vositalari xizmati uchun ortiqcha xarajat qilmaydi”, — deydi Rabbonaqul Muxtorov.
Tuman hokimligi axborot xizmatiga ko‘ra, birlamchi tibbiy-sanitariya xizmatini sifat jihatdan yuqori darajaga chiqarish borasidagi ishlar bosqichma-bosqich davom ettiriladi.
Izoh (0)