Бухоро вилоятининг Қоракўл туманида фаолият юритаётган 40 нафар патронаж ҳамширага ҳудудга чиқиб фаолият юритиши учун велосипед берилди. Бу ҳақда «Дарё»га туман ҳокимлиги ахборот хизмати раҳбари Раббонақул Мухторов хабар қилди.
Таъкидланишича, туман ҳокимлиги ташаббуси билан 40 нафар патронаж ҳамширага велосипед совға қилинган. Бундан ташқари, умумий қиймати 180 миллион сўм бўлган 60 та замонавий планшет, тарози, пулсоксиметр, тонометр-фонендаскоп каби тиббий жиҳозлар ҳам ажратилган.
«Патронаж ҳамшираларга зарур жиҳозлар ва велосипед берилгани уларнинг хизмат вазифасини янада яхши бажариши учун имконият яратади. Энди улар ҳар куни 6-7 километр узоқ масофадан пиёда қатнамайди ва транспорт воситалари хизмати учун ортиқча харажат қилмайди», — дейди Раббонақул Мухторов.
Туман ҳокимлиги ахборот хизматига кўра, бирламчи тиббий-санитария хизматини сифат жиҳатдан юқори даражага чиқариш борасидаги ишлар босқичма-босқич давом эттирилади.
Изоҳ (0)