Buxoroning Jondor tumani Varaxsha cho‘l massividagi Laylaktepa hududida viloyat ekoinspeksiyasi hamda tuman davlat o‘rmon xo‘jaligi xodimlari o‘rtasida sodir bo‘lgan janjal oqibatida inspektorning ko‘zi jarohatlanib, avtomashinasiga shikast yetgan haqida ma’lum qilingan edi. Jondor tuman davlat O‘rmon xo‘jaligi bo‘limi boshlig‘i Jasur Xudoyqulov janjal aslida viloyat Ekologiya va atrof-muhitni muhofaza qilish boshqarmasi inspektorining shaxsiy avtomashinasida reydga chiqib, o‘zini yaqindan tanishtirmagani sababli boshlangan, deya izoh berdi.
Jasur Xudoyqulovga ko‘ra, ushbu janjal vaqtida tuman davlat O‘rmon xo‘jaligi bo‘limining 6 nafar o‘rmonchisi (Aminjon Muhammedov, Farruh Ibodov, Sanjar Fayziyev, Nozimbek Xolov, Solih Hakimov, Zamon Fayziyev) hamda 1 nafar fuqaro (Negmurod Ostonov) bo‘lgan. Negmurod Ostonov tumandagi “Obod” mahallasida yashaydi. Oilasi “temir daftari”ga kiritilgan. Ma’lum bo‘lishicha, u tuman davlat O‘rmon xo‘jaligi bo‘limi xodimlari bilan doimiy ravishda tungi reydlarda xolis guvoh, ya’ni jamoatchi inspektor sifatida qatnashib keladi.
“Daryo” muxbiri holatga oydinlik kiritish uchun voqea ishtirokchilari bilan suhbatlashdi.
“Varaxsha cho‘l massividagi Laylaktepa hududida tungi soat 22:00 dan keyin oq rangli ‘Niva’ hamda qora rangli Lacetti rusumli avtomashinalar to‘xtab turgandi. ‘Niva’dagilar o‘zini ekoinspeksiya xodimlari deb tanishtirib, reydga chiqishganini bildirdi. Lacetti’dagi fuqaro kiyimidagi kishi esa o‘zini tanishtirishni ham istamay, ishim bo‘lmasligini aytib, mashina oynasini ko‘tardi. Men bu paytda uning mashinasi qarshisida edim. U esa haydashga chog‘landi, o‘zimni o‘nglab olmagan ham edim, mashinasini yurg‘izdi. Meni mashinasining old kapoti orqali 1-1,5 qadamgacha sudrab bordi. Men yiqilib tushdim va o‘rnimdan turib, jahl ustida qo‘limdagi saksovul tayog‘i bilan Lacetti’ning yon va old oynalarini sindirib tashladim”, — dedi Negmurod Ostonov.
Negmurod Ostonovning bu iddaosini esa o‘sha kuni voqea joyida bo‘lgan viloyat Ekologiya va atrof-muhitni muhofaza qilish boshqarmasi bosh mutaxassisi A’zam Hasanov rad etdi.
“Bunday holat yuz bergani yo‘q. Aynan shu kishi bizga zo‘rlik ishlatib, qo‘pol muomalada bo‘ldi. Vaholanki, u xolis guvoh sifatida reydlarda yurar ekan, bunday talab qo‘yishga haqli emas. Hech kim mashinasini o‘z-o‘zidan haydab ketishga urinmaydi. O‘sha kezda juda qiyin vaziyatda qolgandik. Qochib, jonimizni saqlashdan boshqa chora qolmagandi. Vaholanki, uning qo‘lida saksovuldan tayoqmas, temir detal edi. Ekologiya inspektorining u fuqaroni mashinasining old kapotida sudragani mutlaqo bo‘lmagan gap”, — dedi A’zam Hasanov.
Jondor tuman davlat O‘rmon xo‘jaligi bo‘limi boshlig‘i Jasur Xudoyqulov va jabrlanuvchi, ekologiya inspektori Davlat Barnoyev voqea sodir bo‘lgan kuni o‘rmon xo‘jaligi xodimlari ularni 60-65 kilometr masofagacha ta’qib qilib borishgani haqida gapirgani, aslida, bu masofa 14-15 kilometrni tashkil etishini bildirdi.
“Daryo” muxbiri bunga ham oydinlik kiritish maqsadida janjal boshlangan joydan temiryo‘l manziligacha bo‘lgan masofa necha kilometrni tashkil etishiga qiziqdi. Haqiqatan ham ushbu oraliq masofa 16 kilometrdan iborat ekanligi oydinlashdi. Biroq muammo ta’qib qilib borilgan masofaning necha kilometrni tashkil etishini izohlashda emas, balki achinarli holatning sodir bo‘lganida.
Voqea ishtirokchisi bo‘lgan Jondor tuman davlat O‘rmon xo‘jaligi bo‘limi o‘rmonchilari surishtiruv jarayonida 28-yanvar kuni o‘tkazilgan tungi reydda ekologiya inspektorlarining hech qanday bildirishsiz va ruxsatnomasiz chiqishganini, o‘zlarini tanishtirishmaganini aytishdi.
Buxoro viloyat Ekologiya va atrof-muhitni muhofaza qilish boshqarmasi matbuot xizmati rahbari Jahongir Navro‘zov esa bunga javoban hududlardagi qonun buzilishi holatlarining oldini olish bo‘yicha o‘tkazilgan nazorat tadbiri va reyd Ekologiya va atrof-muhitni muhofaza qilish davlat qo‘mitasi buyrug‘i asosida olib borilganini tushuntirdi.
Surishtiruv jarayonida davlat O‘rmon xo‘jaligi bo‘limi o‘rmonchilari sodir bo‘lgan holatdan pushaymonligini, yoshlik qilib qiziqqonlikka borishganini, aslida, uzoq yillardan buyon hamjihatlikda ishlab kelishganini bayon etdi. Shuningdek, o‘rmonchilarga ko‘ra, ekoinspeksiya inspektori Davlat Barnoyev tomonidan ular yomon va qo‘pol so‘zlar haqoratlanishmagan hamda janjal vaqtida ularni mushtlamagan va tan jarohati yetkazmagan.
Jasur Xudoyqulovning ta’kidlashicha, Jondor tumani Varaxsha cho‘l massividagi o‘rmon xo‘jaligining jami yer maydoni 88,436 gektarni tashkil etib, shundan 68,115 gektari saksovulzor hisoblanadi.
“Hudud katta va keng. Besh qo‘l barobar emas, balki o‘rmonchilarimiz orasida ham o‘z manfaatini ko‘zlaganlar bordir. Ammo shundaylar uchrasa, biz, albatta, chora ko‘ramiz. Biroq ekologiya inspektorlari ta’kidicha, saksovullar o‘rmon xo‘jaligi vakillari tomonidan o‘g‘irlab sotilmayotgan, tumanning chekka hududlarida yashovchi aholining tabiiy gaz ta’minotidan uzib qo‘yilgani bois tuman hokimligi tavsiyasi bilan muhtoj oilalarning arizalariga ko‘ra, bir nechta aholiga hamda hududdagi maktabgacha ta’lim muassasalariga butoqlangan saksovul shoxlari va tanalaridan bepul yetkazib berganmiz”, — dedi u.
Buxoro viloyat IIB axborot xizmati rahbari Shuhrat Jalolovning “Daryo”ga ma’lum qilishicha, mazkur voqea qamrovi kengligi, o‘rganuv davomida bir holat keyingi boshqa bir holat bilan uzviy bog‘lanib borayotgani voqealar rivojini oshirib, surishtiruv-tergov ishlarining davomiyligini ta’minlamoqda.
Izoh (0)