Toshkent viloyatining Bo‘ka tumanida 8 yoshli qizni Spark urib ketgani, mashina rulida IIB xodimi bo‘lgani aytilgani haqida xabar berilgan edi. Qizaloq shifoxonada ekanligi, ammo YTH sodir etgan haydovchi uning holidan xabar olmayotgani haqida video tarqalib, keng muhokamalarga sabab bo‘lgach, IIBB mabuot xizmati rasmiy munosabat bildirdi.
Qayd etilishicha, 10-fevral kuni Toshkent viloyati IIBB mas’ul rahbarlari shifoxonada davolanayotgan 8 yoshli D.Sh.ning holidan xabar olish va vaziyatga to‘liq oydinlik kiritish maqsadida Bo‘ka tumani markaziy shifoxonasida bo‘ldi.
“U yerda qizning ota-onasi va mas’ul shifokorlar bilan uchrashib, vaziyat shaxsan o‘rganildi, qizaloqning o‘zi bilan ham suhbat qilindi. Uning ota-onasiga bu holatda birinchi navbatda bolaning salomatligi muhimligi, buning uchun barcha zaruriy choralar ko‘rilishi, shuningdek, YTH ishtirokchisiga ham qonuniy chora ko‘rish ta’minlanishi tushuntirildi”, — deyiladi IIBB munosabatida.
Xabarda aytilishicha, hozirda rahbariyat nazoratida hodisa ishtirokchilari tomonidan har qanday moddiy va ma’naviy zararni qoplash choralari ko‘rilmoqda.
Bemorni qabul qilgan shifokor qiz o‘z vaqtida shifoxonaga yetkazilgani va birinchi yordam vaqtida ko‘rsatilganini aytib, uning hozirgi holati yaxshi ekanligi, barcha bemorlar kabi muolaja xonasida davolanishga o‘tganligini ma’lum qilgan.
IIBB e’lon qilgan rasmiy bayonotda YTH sodir etgan haydovchining Ichki ishlar idorasiga aloqasi bor-yo‘qligi haqida hech qanday ma’lumot keltirilmagan.
Izoh (0)