Prezidentning “Qonun hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qo‘shimcha chora-tadbirlar to‘g‘risida”gi farmoni qabul qilindi. Bu haqda Telegram’dagi “Huquqiy axborot” kanali xabar berdi.
Hujjat bilan “Ijro.gov.uz” tizimi orqali Prezident hujjatlari va topshiriqlar ijrosini nazorat qilishning mutlaqo yangi tizimi joriy qilinmoqda.
Farmonga muvofiq, Adliya vazirligi:
- qonun hujjatlari va topshiriqlar o‘z vaqtida ijro etilishining “Ijro.gov.uz” tizimida nazoratini olib boradi va “Ijro.gov.uz” tizimini yuritadi;
- tizimda nazoratga olinadigan topshiriqlarni kiritadi, mazkur topshiriqlardan kelib chiqqan holda mas’ul ijrochilar va bajarish muddatlarini belgilaydi, ular tomonidan kiritilgan ma’lumotlar to‘liqligi va haqqoniyligini tekshiradi, shuningdek, qonun hujjatlari va topshiriqlarda belgilangan ijro muddatlarini uzaytirish haqidagi takliflar asosliligini o‘rganadi;
- qonun hujjatlari va topshiriqlar ijro holati to‘g‘risidagi ma’lumotni har oyda Prezident Administratsiyasi va hukumatga kiritib boradi.
Vazirlar Mahkamasi qonun hujjatlari va topshiriqlar mas’ul ijrochilar tomonidan o‘z vaqtida ijro etilishining “Ijro.gov.uz” tizimida nazoratini olib boradi.
Hisob palatasi tizimda mas’ul ijrochilar tomonidan kiritilib, Adliya vazirligi va Hukumat tomonidan tekshirilgan ma’lumotlar to‘liqligi va haqqoniyligini tekshiradi hamda ularni nazoratdan yechadi. Prezident Administratsiyasi qonun hujjatlari va topshiriqlar ijrosini nazorat qiluvchi tashkilotlar faoliyatini muvofiqlashtiradi.
Nazorat va ijro faqat “Ijro.gov.uz” tizimida amalga oshiriladi, bunda boshqa har qanday nazorat dasturlari, hisobotlari va bazalarini yuritish amaliyoti bekor qilinadi.
Farmonda qayd etilishicha, qonunlar, Prezidentning farmon, qaror, farmoyish va topshiriqlari bajarilishining ta’sirchan tizimini yaratishda jiddiy kamchiliklarga yo‘l qo‘yganligi, ijro intizomini susaytirib yuborganligi va kadrlarga nisbatan talabchanlik qilmaganligi uchun sog‘liqni saqlash, uy-joy kommunal xizmat ko‘rsatish, oliy va o‘rta maxsus ta’lim vazirlari, ayrim davlat qo‘mitalari va agentliklari rahbarlari, shuningdek, 25 ta tuman va shaharlar hokimlari egallab turgan lavozimidan ozod etilgan.
Shuningdek, Vazirlar Mahkamasi rayosatining qarori bilan davlat boshqaruvi organlari va hukumat apparati tarkibiy bo‘linmalarining bir qator rahbarlariga intizomiy jazo choralari qo‘llanilganli, shu jumladan, hayfsan e’lon qilingan, ularning ayrimlari egallab turgan lavozimidan ozod etilgan.
Eslatib o‘tamiz, Shavkat Mirziyoyev raisligida 10-fevral kuni “Yoshlarni qo‘llab-quvvatlash va aholi salomatligini mustahkamlash yili” davlat dasturi ijrosini samarali tashkil etish masalalari yuzasidan videoselektor yig‘ilishi o‘tkazildi. Unda Prezident dasturdan asosiy maqsad qog‘oz yoki hisobot emas, balki odamlar hayotida ijobiy o‘zgarishlar qilishligini ta’kidlagan.
Izoh (0)