Namangan shahrida sodir bo‘lgan yo‘l-tansport hodisasi oqibatida 3 kishi halok bo‘ldi. Bu haqda “Sevimli” telekanalining “Zamon” informatsion dasturida ma’lum qilindi.
Ma’lum qilinishicha, 8-fevral kuni soat 23:50 da Namangan shahridagi Islom Karimov ko‘chasida 20 yoshli Lacetti haydovchisi yo‘l chetidagi reklama tablosiga borib urilgan. Mavjud ma’lumotlarga ko‘ra, avariyadan oldin haydovchi mashinani soatiga 130—140 kilometr tezlikda boshqarayotgan bo‘lgan.
Ta’kidlanishicha, mashina ichida haydovchidan tashqari yana ikki nafar 19 yoshli yo‘lovchi bo‘lgan. Olingan tan jarohatlari oqibatida ularning barchasi voqea joyida vafot etgan.
Avvalroq Farg‘onada 20 yoshli qiz “Moskvich”ning Katta Farg‘ona kanaliga tushib ketishi oqibatida halok bo‘lgani, Qoraqalpog‘istonda Howo va Nexia ishtirokida sodir bo‘lgan YTH oqibatida 5 kishi vafot etgani, Buxoroda uch nafar bolani urib yuborib, voqea joyidan qochgan haydovchi shaxsiga kuzatuv kameralari orqali aniqlik kiritilgani to‘g‘risida xabar berilgandi.
Izoh (0)