Samarqand viloyat prokuraturasi tomonidan o‘tkazilgan nazorat tadbirlari davomida viloyatda olib borilayotgan qurilish-ta’mirlash ishlarida 7 milliard so‘mdan ortiq pul noto‘g‘ri sarflangani aniqlandi. Bu haqda “Daryo”ga prokuratura axborot xizmati xabar berdi.
Ma’lum qilinishicha, 2020-yil ishlab chiqarish infratuzilmasini rivojlantirish dasturi doirasida budjet mablag‘lari hisobidan viloyatda jami 227 ta, jumladan, 3 ta yildan yilga o‘tuvchi va 8 ta noldan boshlanadigan obyektlarni qurish, rekonstruksiya qilish, kapital ta’mirlash va jihozlash ishlariga 1 milliard 189 million 4 00 ming so‘m ajratilgan.
Shuningdek, Prezidentning “Koronavirus pandemiyasi va global inqiroz holatlarining iqtisodiyot tarmoqlariga salbiy ta’sirini yumshatish bo‘yicha birinchi navbatdagi chora-tadbirlar to‘g‘risida” farmoni hamda Vazirlar Mahkamasi rayosat majlisi bayoniga asosan Inqirozga qarshi kurashish jamg‘armasi hisobidan 57 ta obyektlarni qurish, rekonstruksiya qilish, kapital ta’mirlash va jihozlash ishlariga 193 milliard 900 million so‘m ajratilgan.
Bundan tashqari, Vazirlar Mahkamasi qarori hamda rayosat yig‘ilishi bayonlariga asosan Samarqand viloyatini rivojlantirish jamg‘armasi mablag‘lari hisobidan 12 ta obyektni parallel qurish, rekonstruksiya qilish, kapital ta’mirlash va jihozlash ishlariga 239 milliard 800 million so‘m ajratilgan.
Shundan, Samarqand shahrining Gulobod ko‘chasi bo‘ylab Xo‘ja Ahror Vali tarixiy obidasidan Termiz ko‘chasigacha bo‘lgan hududda 1407 metr suv va oqova tarmog‘ini qurilishida pudratchi tashkilot tomonidan bajarilmagan ishlarga 78 million 600 ming so‘m qo‘shib yozilib, talon-toroj qilingan; Afrosiyob ko‘chasida ichimlik suvi quduqlari qurilishida 85 million so‘mlik qurilish-montaj ishlari bajarilmagan; Samarqand shahri va Pastdarg‘om tuman obodonlashtirish boshqarmalari hamda “Suvoqova” davlat unitar korxonasi tomonidan to‘g‘ridan to‘g‘ri import amalga oshirilmasdan, mahalliy korxonalardan qimmat narxlarda xarid qilinishi oqibatida 1,5 milliard so‘mlik texnika va asbob-uskunalar import narxidan qimmatga sotib olinib, davlat va jamiyatning qonuniy manfaatlariga jiddiy ziyon yetkazilgan.
Mazkur holatlar yuzasidan Jinoyat kodeksining tegishli moddalari bilan jinoyat ishi qo‘zg‘atilgan. Va viloyat prokuraturasi tomonidan tergov ishlari olib borilmoqda.
Izoh (0)