Andijonda noqonuniy qurilgan binoning yuqori qavati tadbirkorning o‘z hisobidan buzib tashlanmoqda. Bu haqda Qurilish vazirligi matbuot xizmati xabar berdi.
Ma’lum qilinishicha, Andijon shahar Mashrab ko‘chasi 41-manzilda joylashgan 400 kvadrat metr maydonga 7 qavatli, 24 xonadonli, ya’ni 1-qavatini savdo va maishiy xizmat ko‘rsatish hamda yuqori qavatlarini turar-joy binosiga moslab qurish uchun ruxsat berilganiga qaramay, tadbirkor noqonuniy ravishda binoni 8 qavatli qilib ko‘targan.
Andijon viloyati qurilish sohasida hududiy nazorat inspeksiyasi tomonidan 2020-yil 4-mayda olib borilgan nazorat jarayonida tadbirkor tomonidan binoning yuqori qismiga shaharsozlik hujjatlarisiz noqonuniy ravishda yana qo‘shimcha bitta qavat qo‘shib, qurilish-montaj ishlari (8-qavatda) amalga oshirilayotganligi aniqlangan va ushbu holat bo‘yicha o‘rnatilgan tartibda qurilishni to‘xtatish to‘g‘risida yozma ko‘rsatma berilgan.
Mazkur holatning oldini olish, ya’ni noqonuniy qurilishga yo‘l qo‘ymaslik bo‘yicha qurilish obyektida mas’ul buyurtmachining texnik va loyiha tashkilotining mualliflik nazorati xodimlari tomonidan hech qanday qonuniy choralar ko‘rilmagan.
Buyurtmachi tomonidan texnik nazoratga mas’ul etib tayinlangan D.N. esa qurilish sohasi bo‘yicha ma’lumot va tajribaga ega emasligi, savdo yo‘nalishida faoliyat yuritishi aniqlangan. Shu sababli hududiy inspeksiya tomonidan B.U.ga qurilish jarayonida texnik nazorat olib borish uchun ushbu sohada tajribaga ega bo‘lgan mas’ul shaxsni tayinlash bo‘yicha ham ko‘rsatma berilgan.
Qayd etilishicha, hozirda fuqaro tomonidan noqonuniy amalga oshirilgan qurilish-montaj ishlari o‘z hisobidan buzilmoqda va mazkur jarayon Andijon viloyat qurilish sohasida hududiy nazorat inspeksiyasi tomonidan nazoratga olingan.
Avvalroq Samarqand shahridagi aholi ko‘chib o‘tgan 9 qavatli binoning 2 ta qavati buzib tashlanishi haqida xabar berilgan edi.
Izoh (0)