Qashqadaryo hokimi Zoir Mirzayev viloyatda faoliyat yurituvchi 15 nafar hokim va ularning o‘rinbosarlariga yangi xizmat avtomobili sotib olishni taqiqladi. Bu haqda “Daryo” manbasi xabar berdi.
Ta’kidlanishicha, Zoir Mirzayev bu haqda Prezident Shavkat Mirziyoyev rahbarligidagi selektordan so‘ng o‘tkazilgan yig‘ilishda ma’lum qilgan.
“Hokimga gapirsang, o‘rinbosari ishlamaydi, o‘ribosariga gapirsang, hokim ishlamaydi. Hokimning 4 millird so‘m puli bor. Nimaga ishlatishini bilmaydi va yangi mashina sotib oladi. Endilikda bu taqiqlanadi. Hamma eshitib olsin, birorta hokim ham, o‘rinbosari ham xizmat mashinasi sotib olmaydi. Moratoriy bo‘ladi. Birortasi olmaydi”, — dedi viloyat rahbari.
Zoir Mirzayev barcha hokimlarga xizmat avtomobili sotib olish mumkin emasligini, buni taqiqlashi haqida gapirib, “Mayli, Kosonga ruxsat berganmiz, qolgan birortasi mashina olmaydi”, — degan.
Qo‘shimcha qilinishicha, Zoir Mirzayevning o‘rinbosari — viloyat investitsiyalar va tashqi savdo boshqarmasi boshlig‘i lavozimiga tayinlangan Bahrom Yusupovga ham xizmat avtomobili sotib olishga ruxsat berilgan. Bu haqda viloyat hokimligi axborot xizmati ham yozib, 300 million so‘mdan ortiq mablag‘ aynan xizmat avtomobiliga ajratilganini ta’kidlagandi.
Eslatib o‘tamiz, Koson tumani hokimi Asrol Boyqarayevning 70 027 KAA xizmat mashinasida YTH sodir etilib, oqibatda 60 yoshli fuqaro vafot etgandi. Shundan so‘ng hokim xizmat avtomobilini almashtirishga qaror qilgandi. Viloyatdagi jurnalist va blogerlar bilan suhbatlashgan hokim xizmat avtomobilini almashtirishga qaror qilganini izohlab, “YTHdan zararlangan avtomobilimizni ta’mirlasak, bu avtomobil bizga 276 million so‘mga tushar ekan. Shuning uchun mashinani 220 million so‘mga sotib, ustiga 40 million so‘m qo‘shib, hokimiyatga yangi avtomobil sotib olishga qaror qildik. Shunda biz 16 million so‘m foyda ko‘rar ekanmiz. Shuningdek, davlatga hech qanday zararimiz tegmaydi”, — degandi.
Izoh (0)