Ijtimoiy tarmoqlarda maktab o‘quvchilarining nojo‘ya so‘zlar aytib, maktab darsligini yerga otgani aks etgan videotasvir tarqalib, keng muhokamalarga sabab bo‘ldi.
Xalq ta’limi vazirligi matbuot xizmatining ma’lum qilishicha, mazkur holat vazirlikning nazorat-huquqiy xizmati tomonidan o‘rganilganda, uning Samarqand viloyati, Narpay tumanidagi 17-maktabning 11-“A” sinfi o‘quvchilari tomonidan suratga olingani aniqlangan.
Holat Samarqand viloyati Xalq ta’limi boshqarmasi, tuman hokimligi, voyaga yetmaganlar bo‘yicha idoralararo komissiyasi, IIB hamda o‘quvchilarning ota-onalari ishtirokida muhokama qilingan.
Ota-onalar farzand tarbiyasiga e’tiborsizligi, ularning qilgan axloqsizligi uchun barchadan uzr so‘ragan.
Ota-onalarga Ma’muriy javobgarlik to‘g‘risidagi kodeksining 47-moddasi (bolalarni tarbiyalash va ularga ta’lim berish borasidagi majburiyatlarni bajarmaslik)ga ko‘ra qonunda belgilangan tartibda chora ko‘rilgan, o‘quvchilar esa profilaktik hisobga olingan.
Avvalroq Samarqandda dars paytida oyog‘ini parta ustiga qo‘yib o‘tirgan maktab o‘quvchilarining ota-onalari jarimaga tortilgani, Farg‘onada maktab sinf xonasida pirotexnika portlatgan o‘quvchi IIB ro‘yxatiga olingani haqida xabar berilgan edi.
Izoh (0)