Андижонда ноқонуний қурилган бинонинг юқори қавати тадбиркорнинг ўз ҳисобидан бузиб ташланмоқда. Бу ҳақда Қурилиш вазирлиги матбуот хизмати хабар берди.
Маълум қилинишича, Андижон шаҳар Машраб кўчаси 41-манзилда жойлашган 400 квадрат метр майдонга 7 қаватли, 24 хонадонли, яъни 1-қаватини савдо ва маиший хизмат кўрсатиш ҳамда юқори қаватларини турар-жой биносига мослаб қуриш учун рухсат берилганига қарамай, тадбиркор ноқонуний равишда бинони 8 қаватли қилиб кўтарган.
Андижон вилояти қурилиш соҳасида ҳудудий назорат инспекцияси томонидан 2020 йил 4 майда олиб борилган назорат жараёнида тадбиркор томонидан бинонинг юқори қисмига шаҳарсозлик ҳужжатларисиз ноқонуний равишда яна қўшимча битта қават қўшиб, қурилиш-монтаж ишлари (8-қаватда) амалга оширилаётганлиги аниқланган ва ушбу ҳолат бўйича ўрнатилган тартибда қурилишни тўхтатиш тўғрисида ёзма кўрсатма берилган.
Мазкур ҳолатнинг олдини олиш, яъни ноқонуний қурилишга йўл қўймаслик бўйича қурилиш объектида масъул буюртмачининг техник ва лойиҳа ташкилотининг муаллифлик назорати ходимлари томонидан ҳеч қандай қонуний чоралар кўрилмаган.
Буюртмачи томонидан техник назоратга масъул этиб тайинланган Д.Н. эса қурилиш соҳаси бўйича маълумот ва тажрибага эга эмаслиги, савдо йўналишида фаолият юритиши аниқланган. Шу сабабли ҳудудий инспекция томонидан Б.У.га қурилиш жараёнида техник назорат олиб бориш учун ушбу соҳада тажрибага эга бўлган масъул шахсни тайинлаш бўйича ҳам кўрсатма берилган.
Қайд этилишича, ҳозирда фуқаро томонидан ноқонуний амалга оширилган қурилиш-монтаж ишлари ўз ҳисобидан бузилмоқда ва мазкур жараён Андижон вилоят қурилиш соҳасида ҳудудий назорат инспекцияси томонидан назоратга олинган.
Аввалроқ Самарқанд шаҳридаги аҳоли кўчиб ўтган 9 қаватли бинонинг 2 та қавати бузиб ташланиши ҳақида хабар берилган эди.
Изоҳ (0)