Toshkentning Yakkasaroy tumanidagi Do‘stlik (sobiq Bobur) bog‘i 49 yil muddatga chet ellik investorga topshirildi, deb xabar bermoqda “Podrobno.uz” taniqli jamoat arbobi va jurnalist Abu-Ali Niyozmatovga tayanib.
“O‘zbekiston hukumatining farmoyishi bilan Bobur (Do‘stlik) bog‘i 49 yil muddatga xorijiy investorga beriladi. Investor Toshkentdagi ‘Ekopark’ni boshqarayotgan Eurasia International Marketing MChJdir”, — degan u.
Uning qo‘shimcha qilishicha, ayni paytda ushbu kompaniya bog‘ni modernizatsiya qilish bo‘yicha loyiha tayyorlamoqda. Ushbu loyiha bir oy muddatda hukumatga taqdim etilishi lozim.
Jurnalist, shuningdek, ayni paytda ‘Ekopark’dagi tennis kortlari o‘rnida sport majmuasi qurilish ishlari jadal ravishda olib borilayotganining guvohi bo‘lganini aytib o‘tgan. Shu sababli jamoatchilik Do‘stlik bog‘i o‘rnida ham qurilish ishlari olib borilishi mumkinligidan xavotirga tushgan.
Yakkasasoy tuman hokimi Anvar Sayfutdinov Do‘stlik bog‘i o‘rnida yangi ko‘p qavatli binolar qurilishi haqidagi xabarlar haqiqatga zid ekanligini bildirgan.
Ma’lumot uchun, Vazirlar Mahkamasining 2019-yil 9-iyuldagi qarorida davlat-xususiy sheriklik asosida berilishi mumkin bo‘lgan 37 ta madaniyat va istirohat bog‘i ko‘rsatib o‘tilgan bo‘lib, ular orasida Do‘stlik bog‘i ham bor.
Eslatib o‘tamiz, Toshkentdagi Bobur nomli istirohat bog‘ining nomi Shavkat Mirziyoyevning 2017-yilning yanvaridagi taklifi bilan Do‘stlik bog‘i deb o‘zgartirilgandi. Eski hayvonot bog‘i o‘rnida qurilgan bog‘ (“Ekopark”)ga esa Bobur nomi berildi.
Izoh (0)