Қашқадарё ҳокими Зоир Мирзаев вилоятда фаолият юритувчи 15 нафар ҳоким ва уларнинг ўринбосарларига янги хизмат автомобили сотиб олишни тақиқлади. Бу ҳақда «Дарё» манбаси хабар берди.
Таъкидланишича, Зоир Мирзаев бу ҳақда Президент Шавкат Мирзиёев раҳбарлигидаги селектордан сўнг ўтказилган йиғилишда маълум қилган.
«Ҳокимга гапирсанг, ўринбосари ишламайди, ўрибосарига гапирсанг, ҳоким ишламайди. Ҳокимнинг 4 миллирд сўм пули бор. Нимага ишлатишини билмайди ва янги машина сотиб олади. Эндиликда бу тақиқланади. Ҳамма эшитиб олсин, бирорта ҳоким ҳам, ўринбосари ҳам хизмат машинаси сотиб олмайди. Мораторий бўлади. Бирортаси олмайди», — деди вилоят раҳбари.
Зоир Мирзаев барча ҳокимларга хизмат автомобили сотиб олиш мумкин эмаслигини, буни тақиқлаши ҳақида гапириб, «Майли, Косонга рухсат берганмиз, қолган бирортаси машина олмайди», — деган.
Қўшимча қилинишича, Зоир Мирзаевнинг ўринбосари — вилоят инвестициялар ва ташқи савдо бошқармаси бошлиғи лавозимига тайинланган Баҳром Юсуповга ҳам хизмат автомобили сотиб олишга рухсат берилган. Бу ҳақда вилоят ҳокимлиги ахборот хизмати ҳам ёзиб, 300 миллион сўмдан ортиқ маблағ айнан хизмат автомобилига ажратилганини таъкидлаганди. Айни кунда эса бу хабар ўчирилган.
Эслатиб ўтамиз, Косон тумани ҳокими Асрол Бойқараевнинг 70 027 КАА хизмат машинасида ЙТҲ содир этилиб, оқибатда 60 ёшли фуқаро вафот этганди. Шундан сўнг ҳоким хизмат автомобилини алмаштиришга қарор қилганди. Вилоятдаги журналист ва блогерлар билан суҳбатлашган ҳоким хизмат автомобилини алмаштиришга қарор қилганини изоҳлаб, «ЙТҲдан зарарланган автомобилимизни таъмирласак, бу автомобиль бизга 276 миллион сўмга тушар экан. Шунинг учун машинани 220 миллион сўмга сотиб, устига 40 миллион сўм қўшиб, ҳокимиятга янги автомобиль сотиб олишга қарор қилдик. Шунда биз 16 миллион сўм фойда кўрар эканмиз. Шунингдек, давлатга ҳеч қандай зараримиз тегмайди», — деганди.
Изоҳ (0)