Prezident Shavkat Mirziyoyev 8-fevral, dushanba kuni Andijon va Toshkent viloyatlarida amalga oshirilishi rejalashtirilgan investitsion loyihalar bilan tanishdi. “Gazeta.uz”ning yozishicha, Toshkent viloyatida ishga tushirilishi rejalashtirilgan loyihalar qatoridan elektrotexnika, kir yuvish mashinalari va muzlatkichlar ishlab chiqaruvchi korxona ham o‘rin olgan.
Elektrotexnika vositalarini ishlab chiqarish
Xususan, Sigma Techno Production kompaniyasi Ohangaron tumanida turli elektrotexnika vositalarini (blenderlar, changyutgichlar, elektrochoynak va hokazo) ishlab chiqarishni yo‘lga qo‘yishni rejalashtirgan. Ishlab chiqarish quvvati 3,3 million dollarga 600 ming donani tashkil etadi. Loyihaning umumiy qiymati 10 million dollarga baholanmoqda. Moliyalashtirishdagi barcha mablag‘lar xorij investitsiyalari hisobidan amalga oshiriladi.
Sigma Techno Production kompaniyasi haqida
Korxona va tashkilotlarning yagona davlat registri ma’lumotlariga ko‘ra, Sigma Techno Production kompaniyasi 2020-yilning 29-iyunida ro‘yxatdan o‘tkazilgan. Asosiy ish faoliyati — elektr-maishiy texnikalarni ishlab chiqarish. Yagona ta’sischisi sifatida Turkiyaning Palvan Insaat Turizm Lojistik Sanayi Ticaret Limited Sirketi ko‘rsatilgan bo‘lib, uning rahbari Egamberdi Ikromjonovich Egamberdiyev.
Palvan Insaat, shuningdek, 2020-yilning 30-iyunida ro‘yxatdan o‘tkazilgan va mustahkam shisha mahsulotlarini ishlab chiqarish hamda qayta ishlash bilan shug‘ullanuvchi Sigma Glass Production korxonasiga ham egalik qiladi. Bu yerda ham rahbar sifatida Egamberdi Egamberdiyev ko‘rsatilgan.
Ahangaran Sigma Cement sement zavodining 100 foiz ulushi ham Palvan Insaat’ga tegishli. Korxona rahbari — Egamberdi Egamberdiyev.
Bundan tashqari, Palvan Insaat 2017-yilning 20-oktabridan beri Qo‘qonda yog‘och, qurilish materiallari va sanitariya uskunalarini ulgurji sotish bilan shug‘ullanib kelayotgan Baraka International Trade Group’ning 50 foiz ulushiga egalik qiladi (qolgan 50 foizi Xitoyning Urumqi Kailingda International Trade kompaniyasiga tegishli).
Kish yuvish mashinalari va muzlatkichlar ishlab chiqarish
“Angren” erkin iqtisodiy zonasi hududida Premier Electrotech kompaniyasi kir yuvish mashinalari va muzlatkichlarni ishlab chiqarishni yo‘lga qo‘ymoqchi. Ishlab chiqarish quvvati — 330 ming dona. Loyihaning umumiy qiymati 23 million dollarga baholangan bo‘lib, uning 4 million dollari — shaxsiy mablag‘lar, 19 million dollari esa — xorijiy investitsiyalar. Moliyalashtirishdagi barcha mablag‘lar xorij investitsiyalari hisobidan amalga oshiriladi.
Korxonani 12 oy ichida ishga tushirish rejalashtirilgan. Yaratiladigan ish joylari soni 200 ta.
Premier Electrotech kompaniyasi haqida
Korxona va tashkilotlarning yagona davlat registri ma’lumotlariga ko‘ra, Premier Electrotech kimpaniyasi 2020-yilning 1-mayida ro‘yxatdan o‘tkazilgan. Maishiy elektonika vositalarini ishlab chiqarish bilan shug‘ullanadi. Ta’sischi — BAAning Fajr Mustaqbal General Trading LLC (85 foiz) va Vista Elektronics Group qo‘shma korxonasi (15 foiz). Rahbar — Muhammadyusuf Muhammadrizayev.
Shu bilan birga, Vista Elektronics Group ta’sischisi Fajr Mustaqbal General Trading LLC (81,6 foiz) hisoblanadi, qolgan ulushga esa Saidmuhtor Sainuridinov (18,4 foiz) egalik qiladi. Sainuridinov, shuningdek, Premier Electronics tovar belgisini ro‘yxatdan o‘tkazish uchun ariza bergan.
Eslatib o‘tamiz 2020-yilning fevralida Fajr Mustaqbal General Trading LLC kompaniyasi “Chorsu” mehmonxonasini sotib olish bo‘yicha auksionda ham qatnashgan, biroq BAAning boshqa bir kompaniyasi — Ittihad International Investment LLC’ga yutqazib qo‘ygandi.
Izoh (0)