Prezident Shavkat Mirziyoyev raisligida bo‘lib o‘tayotgan 2021-yilgi davlat dasturida belgilangan vazifalar ijrosini ta’minlashga bag‘ishlangan selektor yig‘ilishida majlisbozlikka yo‘l qo‘yayotgan hokimlar qattiq ogohlantirildi. Bu haqda “Daryo” manbasi xabar berdi.
“Majlis qilmoqchimisan? Ishtirokchilar 15 kishidan oshiqmi, unda bosh vazirdan ruxsat olasan va keyin mahallaga borib, majlisni o‘sha yerda o‘tkazasan”, — dedi davlat rahbari.
Prezident, shuningdek, hokimiyatda bo‘lib o‘tadigan majlislarga mahalla raislari va “uchastkovoy”larni chaqirishni taqiqlab, Toshkentdan borib “rayon”larda majlis qilishni ham man etgan.
“Bu ‘uchastkovoy’larga boshliq bo‘lmagan odamning o‘zi yo‘q ekan. Ichki ishlar tizimi masalasini o‘zi yaqin orada alohida ko‘rib chiqamiz”, — degan Prezident.
Prezident Shavkat Mirziyoyev selektorda, shuningdek, majlisbozlikka yo‘l qo‘yayotgan rahbarlar ishdan olinishini ham ta’kidlagan.
“Ogohlantirishlardan charchadim, endi bu holatga yo‘l qo‘yganlar ishdan olinadi”, — deya ogohlantirgan davlat rahbari.
Prezident rahbarligidagi selektor yig‘ilishi davom etmoqda. Unda barcha viloyat rahbarlarining axboroti tinglanmoqda.
Izoh (0)