Жанубий Корея компанияси Ўзбекистонда учта йирик лойиҳани амалга оширишни режалаштирмоқда

Ўзбекистоннинг Жанубий Кореядаги элчиси Виталий Фен Hanshin Engineering & Construction Co., Ltd компанияси раиси Чои Ён Сон билан учрашди, деб хабар берди «Дунё» агентлиги.

Учрашув давомида Hanshin Engineering & Construction компаниясининг Ўзбекистонда учта инвестицион лойиҳани амалга ошириш борасидаги режаси муҳокама қилинган. Режадаги йирик лойиҳалар қаторидан Kokand City, лойиҳа институти ва гольф комплекси ўрин олган.

Kokand City

Ҳозирда Қўқон шаҳрида 34 гектар майдонда жойлашган кўп хонадонли Kokand City турар-жой мажмуаларини қуриш масаласи ишлаб чиқилмоқда. Ноябрь ойида Hanshin Engineering & Construction компаниясининг делегацияси Фарғона вилоятига ташриф буюрган эди. У ерда ички уй-жой бозоридаги вазият батафсил ўрганилиб, қурилиш материаллари етказиб берувчилари, лойиҳалаш институтлари билан учрашувлар ўтказилган, шунингдек, лойиҳа учун ажратилган майдон кўздан кечирилган.

Лойиҳа институти

Шунингдек, компания «Қишлоққурилишлойиҳа» МЧЖ, «Тошуйжойлити» АЖ ва «Ўзоғирсаноатлойиҳа» АЖ негизида «МДҲ маконида ноёб бўлиб қоладиган» қўшма лойиҳа институтини яратишни режалаштирмоқда. Энди томонлар ушбу учта лойиҳа ва тадқиқот институтларининг фаолият кўлами, асосий молиявий-иқтисодий кўрсаткичлари тўғрисида фикр алмашмоқда. Hanshin Engineering & Construction лойиҳа институтларида давлат улушини сотиб олиш имкониятини кўриб чиқади.

Гольф комплекси

Жанубий Корея компанияси 800 миллион долларга Самарқанд вилоятида халқаро тоифадаги гольф мажмуасини барпо этишни режалаштирмоқда. Лойиҳани 270 гектар майдонда амалга ошириш кўзда тутилган, шундан гольф майдони ва ташриф буюрувчилар учун турар жой бинолари 194 гектарни, халқаро мактаб 6 гектарни, савдо-кўнгилочар ва кўргазма мажмуаси 7 гектарни, замонавий кўп қаватли турар-жой мажмуаси — 55 гектарни ва унга қўшни бошқа инфратузилмалар эгалламоқда.

Лойиҳанинг концепцияси 2019 йил ноябрь ойида Самарқанд вилояти ҳокими Эркинжон Турдимов ва Инвестициялар ва ташқи савдо вазирлигига тақдим этилган. Hanshin Engineering & Construction қурилиш ишларини бошлаш учун жавобни кутмоқда.

Учала лойиҳани ҳам тўғридан-тўғри инвестициялар эвазига амалга ошириш режалаштирилган. 12—19 февраль кунлари компания бош ижрочи директори бошчилигидаги делегация Ўзбекистон билан музокараларни давом эттириши кутилмоқда.

2019 йил июль ойида сузиш ҳавзалари, сунъий ороллар, ресторанлар, меҳмонхоналар ва конгресслар марказини ўз ичига олган Самарқанддаги эшкак эшиш каналида сайёҳлик маркази қурилиши режалаштирилгани ҳақида хабар берилганди.