Божхоначига 9400 доллар таклиф қилган шахс ушланди

Қиймати 4 миллиард сўмдан ортиқ бўлган товар-моддий бойликлари контрабандаси учун божхона хизмати ходимига 9400 доллар миқдорида пора беришга уринган тадбиркор қўлга олинди, дея хабар бермоқда Ўзбекистон Давлат божхона қўмитаси матбуот хизмати.

Хабар беришларича, кўп босқичли тезкор тадбир Давлат божхона қўмитасининг Коррупцияга қарши курашиш ва Ўз хавфсизлик бошқармаси, Тошкент шаҳар ва Фарғона вилояти божхона бошқармалари томонидан ДХХ ходимлари билан ҳамкорликда ўтказилган.

Тадбиркор 2020 йилнинг декабрь ойида божхона ходимларидан бирининг телефон рақамларини топиб, унга учрашиб гаплашиб олишни таклиф қилади. Ўзаро учрашувда у тез кунларда хориждан унга тегишли контейнерлар етиб келиши, уларни инспекцион кўрик мажмуаси орқали сканердан ўтказмасликни ҳамда «Хавфни бошқариш тизими»да хавф гуруҳига киритмасликни сўраган. Божхона ходими бу ҳолат ҳақида ўз раҳбариятини хабардор қилган, шундан сўнг жиноий ҳаракатларни фош қилишга қаратилган режа-топшириқ ишлаб чиқилган.

Январь ойи бошида тадбиркор божхона ходимига пора тариқасида 9400 доллар пул ва бир дона қимматбаҳо қўл соати берган. Тезкор тадбир шу билан тугатилмаган, чунки контейнерлар ҳали Ўзбекистонга кириб келмаган эди. 14—15 январь кунлари кутилган учта контейнер «Чуқурсой техник идора» чегара-божхона пости орқали кириб келади.

Божхона назоратида контейнердаги юклар билан уларга тегишли ҳужжатлар ўртасида тафовутлар аниқланади ҳамда чуқурлаштирилган божхона кўригидан ўтказиш белгиланади. Юкларни божхонада расмийлаштириш учун юк эгаларининг хоҳишига биноан контейнерлар Фарғона вилоятидаги «Қўқон» ташқи иқтисодий фаолият божхона постига йўналтирилади.

Ушбу постга етгунга қадар контейнерлар божхона пломбалари билан муҳрланган ҳолатда бўлади ва уларни йўл давомида очиш мумкин эмас. Бироқ контейнерлар Данғара туманидаги қишлоқларнинг бирида номаълум шахслар томонидан пломбаларига шикаст етказилмаган ҳолда очилган. Улар контейнерлардаги қиммат товарларни қиймати паст бошқа маҳсулотларга алмаштираётганида тезкор ходимлар томонидан ушланган. Воқеа жойида контейнернинг темир асосларини кесиб очишда фойдаланилган мосламалар, қирилган ва ранги кўчган қисмларни бўяш учун бўёқ ва бошқа ашёвий далиллар топилган.

Воқеа жойида тезкор ходимлар томонидан қиймати 4,16 миллиард сўмлик 2200 дона болалар, 800 дона катталар, 327 дона турли ўлчамдаги велосипед товарлари, велосипед эҳтиёт қисмлари ва бошқа товарлар, шунингдек, пора тариқасида тақдим қилинган 9400 доллар ва 1 дона қўл соати далилий ашё сифатида вақтинча сақловга олинган. Ҳозирда мазкур ҳолат юзасидан божхона органлари томонидан жиноят иши қўзғатилиб, тергов ҳаракатлари давом эттирилмоқда.