“Ular ham aslida kimningdir farzandi, ularda ham oila bor” — Rasul Kusherbayev YPX xodimlariga yuklanayotgan ortiqcha vazifalar haqida

Oliy Majlis Qonunchilik palatasi deputati Rasul Kusherbayev o‘zining Telegram’dagi kanali orqali YPX xodimlarini “rezultat” uchun ishlashga, qonunda ko‘rsatilmagan qo‘shimcha topshiriqlarni bajarishga majbur bo‘layotgani to‘g‘risidagi muammolarga e’tibor qaratdi.

Kecha yomg‘ir ostida xizmat qilayotgan yo‘l harakati inspektoriga duch keldim. O‘z-o‘zidan undan ishlarning ahvoli va sharoitlar haqida so‘radim.

Bilasizmi, ismi sir qolishi sharti bilan boyaqish xodim bir dunyo muammolarini aytib berdi: og‘ir ish yuklamasi, ayrim “rezultat” uchun ishlar, “kattalar”ni qonunda ko‘rsatilmagan qo‘shimcha topshiriqlari va hokazo.

Eng asosiysi va norozilikning boshi – ularning hamon normal ish rejimiga rioya qilmagan holda majburiy ishlatilishga yo‘l qo‘yilayotgani. Ayrimlari hamon sutkalab uyiga borolmaydi.

Ular ham aslida kimningdir farzandi, otasi, akasi yo ukasi, ularda ham oila bor. Lekin haliyam jonsiz robotdek munosabat.

“Ichki ishlar organlari to‘g‘risida”gi qonun talablaridagi mehnat muhofazasi masalalari hamon ichki ishlar tizimining o‘ziga tatbiq qilinmayotganligi achinarli hol. Aslida qonun talabini buzganlik uchun biz ichki ishlarga murojaat qilishimiz kerak. Biroq ularning o‘zlari o‘zlariga tegishli qonunlarga amal qilisha olmayapti.

Bu holatda kim kimga suyanadi? Savol hamon ochiq.

Og‘ir ish yuklamasi, charchoq asabbuzarlik va fuqarolar bilan munosabatda chegaradan chiqishga olib kelishi mumkin.

Kamiga, eshitishimizcha, Toshkent viloyatidagi yo‘l harakati xodimlarini yana navbatdan tashqari attestatsiyada o‘tkazishmoqchi ekan. O‘zi o‘tgan yili shunday attestatsiya o‘tkazilib noqulay, normal bo‘lmagan ish rejimi sharoitida ishlashga chidab yurgan xodimlar orasidan 140 tachasi 6 oy muddatga qolib ketgan ekan. Prinsipning noyobligini qarang — sharoit yo‘q, biroq talablar bir dunyo. Attestatsiyada ham davriylik bo‘lishi kerak.

Biz IIV rahbariyatidan o‘z xodimlariga nisbatan mavjud qonun talablariga amal qilishlarini so‘rayotgan bir vaqtda qonun talablariga amal qilmayotgan tizimning yuqori elitasi quyi xodimlarni qayta-qayta attestatsiyadan o‘tkazish bilan shug‘ullansa. Biroq bu bilan yuqoridagi qonun ishlab ham ketmayapti.

Balki, attestatsiyani tizimning boshidan boshlasa adolatli bo‘lar. Masalan, tizim boshidagilarning “Ichki ishlar organlari to‘g‘risida”gi qonun talablaridan qanchalik xabardorligi va bunga tizimda qanchalik amal qilishayotganligi yuzasidan.

Rasul Kusherbayev, Oliy Majlis Qonunchilik palatasi deputati