«Ҳудудгаз Самарқанд» газ таъминоти филиали томонидан 2021 йилнинг январь ойида ўтказилган тадбирлар давомида шартнома шартларига амал қилмай, газ тармоқларига ноқонуний уланиш бўйича 31 та ҳолат аниқланган. Бу ҳақда «Дарё»га «Ҳудудгаз Самарқанд» газ таъминоти филиали ахборот хизмати маълум қилди.
Маълум бўлишича, ноқонуний уланишлар натижасида газ таъминоти корхоналарига 393 миллион 869 минг сўм зарар етказилган.
«‘Ҳудудгаз Самарқанд’ газ таъминоти филиали томонидан якка тартибдаги хўжалик юритувчи субъектларнинг газ ўғриликларини аниқлаш бўйича назорат тадбирлари ўтказилди. Пастдарғом туманида ўтказилган назорат тадбирида туманнинг ‘Намозгоҳ’ маҳалласида яшовчи фуқаро Н.Н. ўзбошимчалик билан ҳеч қандай ҳужжатларсиз ноқонуний равишда табиий газ тармоғига уланиб олгани аниқланган. У 7,5 сотих ер майдонида иссиқхона ташкил этиб, бодринг ва полиз экинлари етиштириб, 3 та қўлбола иситиш печи ва 2 та қўлбола иситиш қозонининг ҳар бирида 2 тадан газ ёндиргичдан (горелка) фойдаланиб келгани аниқланди», — дейилади филиал ахборот хизмати хабарида.
Айтилишича, истеъмолчининг газ тармоғига ноқонуний уланиш ҳолати қайта ҳисоб-китоб қилиниб, газ тармоғидан узилган. Ушбу иссиқхонада ноқонуний фойдаланилган газ ҳажми 57002, 4 метр кубни ташкил этиб, газ таъминоти ташкилотларига етказилган зарар миқдори 57 миллион сўмни ташкил этган.
Шунингдек, «Нарпайтумангаз» томонидан ўтказилган текширувлар давомида газ тармоғига ноқонуний уланиб, оҳак ишлаб чиқараётган тадбиркор ҳам аниқланган. Тумангаз таъминоти бўлими ходимлари томонидан тузилган далолатномага кўра, Оқтош шаҳри, «Муқимий» маҳалласида яшовчи фуқаро У.Н. 2020 йилнинг 22 декабрь кунидан газ тармоғига ноқонуний уланиб, оҳак пишириш учун 12 дона қўлбола ёндиргичдан фойдаланиб келган. Дастлабки ҳисоб-китобларга кўра, 13 суткадаги ноқонуний фаолияти натижасида газ таъминоти корхоналарига 31 миллион 973 минг сўм зарар етказилган.
Аниқланган ноқонуний ҳолатлар бўйича тўпланган барча материаллар ҳуқуқни муҳофаза қилиш органларига топширилган.
Изоҳ (0)