6-fevral kuni Fransiya, Shveysariya, Andorra va boshqa Yevropa mamlakatlarida kamyob meteorologik hodisa kuzatildi — shaharlarda osmon sariq tus oldi, tog‘-chang‘i kurortlaridagi qor esa jigarrang tusga kirdi, deb yozadi Meduza.
Bu sirokko (garmsel) deb nomlanuvchi issiq shamol tufayli yuz berdi, u o‘zi bilan Sahroi Kabirdan ko‘p miqdorda mayda qum va chang olib keldi.
Qumning havodagi zichligi yuqori bo‘lsa, ko‘rinish darajasi yomonlashadi. Sahro Kabirdan kelgan chang nafaqat osmonda, balki, yerda ham o‘z “izini” qoldirdi. Mikrozarralar yuzalarga kelib qo‘nmoqda.
Sahroi Kabir changining ijobiy tomoni ham bor. Undagi ko‘plab ozuqaviy moddalar o‘simliklar uchun o‘g‘it hisoblanadi. Masalan, tadqiqotlardan birida aytilishicha, dunyodagi eng yirik sahrodan kelgan mikrozarralar Amazonka mintaqasida floraning xilma-xilligi uchun juda muhimdir. Passatlar (tropiklardan ekvatorga tomon doim esib turadigan quruq shamol) changni Afrikadan Atlantika okeani orqali Janubiy Amerikaga olib keladi, va Amazonka mintaqasining o‘zida yiliga tonnalab Afrikadan kelgan changlar o‘tirib qoladi.
Eslatib o‘tamiz, yanvar o‘rtalarida Sahroi Kabirda havo harorati noldan pasayib ketganidan keyin kutilmaganda qor yog‘gan edi.
Kuni kecha esa Germaniya va Niderlandiya kuchli qor sabab transport harakatini to‘xtatib qo‘ydi.
Izoh (0)